ХК «Дынама-Мінск» выбачыўся перад заўзятарамі, якія паўгадзіны стаялі на марозе перад матчам на «Мінск-Арэне»
Хакейны клуб «Дынама» (Мінск) выказаў прабачэнні заўзятарам за нязручнасці пры праходзе на матч з яраслаўскім «Лакаматывам» 29 студзеня.
У той дзень была абмежавана колькасць пунктаў пропуску, а агляд грамадзян быў значна ўзмоцнены.
У выніку многія, уключаючы дзяцей, вымушаны былі правесці паўгадзіны на ветры і 15-градусным марозе.
«Клубам былі своечасова распачаты ўсе меры, каб прадухіліць магчымыя ўскладненні пры праходзе на «Мінск-Арэну». Задаўга да пачатку матчу клуб праінфармаваў работнікаў МУС пра колькасць прададзеных білетаў і меркаваную колькасць гледачоў», — гаворыцца ў паведамленні «Дынама».
Клуб звяртае ўвагу заўзятараў на тое, што згодна з заканадаўствам падчас правядзення масавых мерапрыемстваў асабісты агляд грамадзян і агляд іх рэчаў ажыццяўляецца супрацоўнікамі МУС. «У сувязі з гэтым пры атрыманні неабходных звестак ад клуба праваахоўныя органы аналізуюць інфармацыю і выстаўляюць на мерапрыемства дастатковую для гарантавання захадаў бяспекі колькасць супрацоўнікаў», — адзначаецца ў прэс-рэлізе.
«Дынама» заяўляе, што «даражыць кожным сваім заўзятараў». «Мы рэагуем на ўсе вашы пажаданні і стараемся ўлічыць іх у сваёй працы. Спадзяемся, што інцыдэнт, які меў месца на матчы з «Лакаматывам», надалей не паўторыцца і не адаб'ецца на вашым стаўленні да клуба», — гаворыцца ў паведамленні.
Тым часам узмацненне кантролю і, як вынік, утварэнне доўгіх чэргаў у апошнія дні закранула ўсе масавыя спартыўныя мерапрыемствы, якія праводзяцца ў закрытых памяшканнях.
Напрыклад, 31 студзеня такая ж карціна назіралася на матчы Кубка Дэвіса Беларусь — Ірландыя ў Рэспубліканскім цэнтры алімпійскай падрыхтоўкі па тэнісе і на матчы хакейнага чэмпіянату «Юнацтва» — «Нёман» на «Чыжоўка-Арэне». Прадстаўнікоў СМІ аглядаюць так жа старанна, як і балельшчыкаў. Звычайна такія меры ажыццяўляюцца на футбольных матчах.
Пры адсутнасці афіцыйных каментараў вылучаюцца розныя версіі: альбо праводзяцца вучэнні, альбо камусьці ўдалося пранесці муляжы выбуховых прылад.
Цяпер чытаюць
Галоўным спікерам Жаночага форуму ў Мінску стане расійскі крынджовы псіхолаг, які расказваў пра «памяць жаночых палавых губ»14
Каментары