Расія праз малавядомую зарэгістраваную ў Ізраілі кампанію GLI Ltd прапануе кампаніям, якія працуюць у Польшчы, купіць 1 млрд кубаметраў газу па $270 за тысячу кубаметраў.
Пра гэта піша польская Rzeczpospolita, адзначаючы, што гэта прапанова можа быць звязана з сітуацыяй ва Украіне, якой «Газпром» пагражае адключэннем газу з чэрвеня бягучага года і спробай паламаць планы па зніжэнні энергетычнай залежнасці ад Расіі.
Як адзначаецца, кошт у $270 за тысячу кубаметраў на 35% танней кошту паліва, якое купляецца нацыянальным нафтагазавых гігантам PGNIG у «Газпрома».
«Спроба запусціць на наш рынак 1 млрд кубаметраў газу павінна паказаць, што мы можам рабіць розныя заявы адносна энергетычнага саюза, але тое, як будзе выглядаць рынак, усё роўна вырашыць вытворца сыравіны. Расейцы, нават калі б паставілі такую колькасць, фінансава выйгралі б мала, але палітычна — вельмі шмат», — сказаў на ўмовах ананімнасці прадстаўнік PGNIG.
Польшча штогод спажывае каля 15 млрд кубаметраў газу.
Газета адзначае, што PGNIG, якая купляе газ у Расіі па ямальскім кантракце і прадае яго спажыўцам у Польшчы, плаціць цяпер за тысячу кубаметраў каля $410.
Выданне лічыць пагрозлівым для энергетычнай бяспекі краіны заключэнне кантрактаў з такімі пасярэднікамі, паколькі адразу паўстае аргумент: навошта інвеставаць сродкі ў дыверсіфікацыю паставак, калі адразу можна купляць газ танней?
Па дадзеных газеты, людзі, якія прадстаўляюць GLI Ltd ў Польшчы, — Людміла Гросман і Йігал Фаркаш — раней працавалі ў абаронным бізнесе і мала вядомыя на польскім рынку энергетыкі.
Выданне не мае дадзеных, ці скарысталася якая-небудзь польская кампанія прапановай GLI Ltd, але адзначае, што яна з'явілася на рынку некалькі тыдняў таму.
Як паведамлялася, кіраўнік польскага ўрада Дональд Туск пасля захопу Крыма Расіяй і дэстабілізацыі сітуацыі на паўднёвым усходзе Украіны заклікаў Еўрапейскі Саюз стварыць новы энергетычны саюз, дзякуючы якому краіны аб'яднання маглі б лепш супрацьстаяць энергетычнай залежнасці ад Расіі, якая выкарыстоўвае яе ў палітычных мэтах.
Польшча, у прыватнасці, прапануе ЕС сумесна весці перамовы аб куплі газу замест двухбаковых перамоваў на ўзроўні краін, што прыводзіць да розных коштаў на расійскае «блакітнае паліва» для еўрапейскіх дзяржаў.
Цяпер чытаюць
Беласток на вушах праз знікненне актывіста Вайцяхоўскага, суседа памерлага шпіёна Усера. А той цішком вярнуўся ў Беларусь7
Каментары