Цэнтр аналітычных і генна-інжынерных даследаванняў адкрыўся пры НАН Беларусі
У Інстытуце мікрабіялогіі дзяржаўнага навукова-вытворчага аб'яднання «Хімічны сінтэз і біятэхналогіі» Нацыянальнай акадэміі навук (НАН) Беларусі пачаў працу Цэнтр аналітычных і генна-інжынерных даследаванняў (ЦАГІД).
Падчас цырымоніі адкрыцця 9 верасня чырвоную стужку перарэзалі дырэктар Інстытута мікрабіялогіі Эмілія Каламіец і першы намеснік старшыні прэзідыума НАН Беларусі Сяргей Чыжык.
Цэнтр укамплектаваны найноўшым навуковым абсталяваннем для генна-інжынерных, малекулярна-біялагічных і біяхімічных даследаванняў. Спецыялісты ЦАГІД змогуць праводзіць малекулярна-генетычную дыягностыку прыродных мікраарганізмаў, перспектыўных для біятэхналагічнай вытворчасці; вывучаць прыроду метабалітаў (прадуктаў жыццядзейнасці мікраарганізмаў) штамаў, якія сінтэзуюць біялагічна актыўныя рэчывы; ствараць сістэмы для малекулярнага кланавання.
На абсталяванні цэнтра таксама можна ствараць штамы-суперпрадуцэнты біябутанолу для атрымання біяпаліва новага пакалення, малочнай кіслаты для біядэградаваных імплантаў, фермент фітазы для паляпшэння засваяльнасці сельскагаспадарчых кармоў, вакцынавых злучэнняў для ўзмацнення прыроджанага імунітэту, а таксама многія іншыя рэчывы.
«Уся апаратура і прыборы ў нашым цэнтры — усё самае сучаснае, — адзначыла ў гутарцы з журналістамі Эмілія Каламіец. — Мы набылі апошняе слова тэхнікі, таму сёння наша беларуская навука можа працаваць на тым узроўні, пра які мы яшчэ нядаўна толькі марылі».
Праца Інстытута мікрабіялогіі раней шмат у чым была звязана з сельскай гаспадаркай, аднак зараз, сказала дырэктар, наяўнасць новага абсталявання «адкрывае шлях для далейшай працы і ў медыцыне, і ў прыродаахоўнай тэматыцы, і ў прамысловасці «.
«Мы можам праводзіць любыя працы па генна-інжынерным канструяванні штамаў мікраарганізмаў, можам аналізаваць прадукты метабалізму, якія атрымліваюцца падчас іх росту, можам ажыццяўляць накіраваны сінтэз. Такім чынам, мы ўжо сёння можам пастаўляць краіне фармсубстанцыі, прабіятычныя прэпараты, прадуцэнты біябутанолу для біяэнергетыкі», — дадала Каламіец.
Нягледзячы на тое што сёння прысутнасць мікрабіялогіі «адчуваецца ва ўсіх галінах», гэты профільны інстытут НАН Беларусі ставіць перад сабой задачу зрабіць так, каб «яе прысутнасць была паўнацэннай».
«Цэнтр такую магчымасць сёння дае», — падсумавала Каламіец.
Цяпер чытаюць
Як рыхтаваўся візіт Ціханоўскай у Кіеў і чаму ён некалькі разоў пераносіўся7
Каментары