У Беларусі распачатая чарговая справа ў дачыненні да незалежнага журналіста за працу без акрэдытацыі
Чарговая адміністрацыйная справа за працу без акрэдытацыі распачатая ў дачыненні да журналіста ў Гродне.
Як паведамляе прэс-служба РГА «Беларуская асацыяцыя журналістаў» (БАЖ), журналіст Андрэй Мялешка атрымаў паведамленне з суда Гродзенскай вобласці. У лісце за подпісам старшыні суда паведамляецца, што справа ў дачыненні да Мялешкі распачатая на падставе ч. 2 арт. 22.9 КоАП (парушэнне парадку вырабу і распаўсюджвання прадукцыі СМІ) і накіраваная на разгляд у суд Гродзенскага раёна. Адпаведнае паведамленне накіраванае таксама ва ўпраўленне ўнутраных спраў Кастрычніцкага раёна Гродна, дзе прапісаны журналіст.
Мялешка не ведае, за якое парушэнне яго хочуць прыцягнуць да адказнасці, бо пратакол аб адміністрацыйным правапарушэнні складалі без яго ўдзелу.
Як адзначае прэс-служба БАЖ, сёлета гэта ўжо дзявяты выпадак прыцягнення журналіста да адказнасці за працу на замежны СМІ без акрэдытацыі. На працягу года падобныя справы вяліся ў дачыненні да членаў БАЖ Алеся Дзянісава (штраф), Алеся Залеўскага (штраф), Аляксандра Буракова (адна справа за сюжэт на тэлеканале «Белсат», вынік пакуль невядомы, другая — за матэрыял на сайце радыёстанцыі «Нямецкая хваля», пасяджэнне 30 верасня), Віталя Сямашкі (справа закрытая), Марыны Малчанавай (штраф) і самога Андрэя Мялешкі (штраф).
Акрамя таго, шасцёра журналістаў сёлета атрымалі папярэджанні пракуратуры за супрацоўніцтва з замежнымі СМІ без акрэдытацыі.
Міжнародныя арганізацыі даўно заклікаюць улады Беларусі адмяніць «анахранічны парадак акрэдытацыі, які парушае правы на доступ да інфармацыі».
Прадстаўнік АБСЕ па пытаннях свабоды СМІ Дунья Міятавіч, якая наведвала Мінск 15—16 верасня гэтага года, акцэнтавала ўвагу на неабходнасці адмены абавязковай акрэдытацыі журналістаў.
Беларуская асацыяцыя журналістаў выступіла з заявай, у якой запатрабавала ад дзяржаўных органаў і службовых асоб спыніць адміністрацыйны пераслед і націск на журналістаў-фрылансераў у сувязі з размяшчэннем імі матэрыялаў у замежных СМІ.
Цяпер чытаюць
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім6
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»3232
Каментары