19‑гадовая дзяўчына пайшла працаваць трактарысткай. Расказвае, як ёй
19‑гадовая Аляксандра Маскалейчык з вёскі Бераснёўкі Докшыцкага раёна. Яна працуе ў гаспадарцы «Бягомльскае». І яна там адзіная дзяўчына-механізатар.
«Бацькі першапачаткова бачылі мяне ў іншай прафесіі, адгаворвалі: «Гэта мужчынская праца, дзяўчынцы будзе цяжка». Хацелі, каб я пайшла на кухара-кандытара, цырульніцу ці прадаўца, але я настаяла на сваім. Вядома, ім было складана адпусціць дачку ў такую сферу, аднак з часам яны змірыліся», — расказала Аляксандра sb.by.
Усяго ў шматдзетнай сям’і, дзе расла Аляксандра, шасцёра дзяцей, і яна другая па старшынстве. З юных гадоў дзяўчына дапамагала бацькам з жывёламі, у агародзе, а таксама з малодшымі братамі і сястрой. За стырно трактара ў першы раз села ў 15 гадоў.
Дарэчы, у сям’і Маскалейчык прафесія трактарыста — традыцыя. У полі за стырном працаваў дзядуля Аляксандры, а на яе выбар паўплываў старэйшы брат Аляксей, які першым паступіў на трактарыста-машыніста ў Лепельскі дзяржаўны аграрна-тэхнічны каледж. Дарэчы, Саша была адзінай дзяўчынай у сваёй групе, аднак гэта яе ніяк не бянтэжыла.
У гаспадарцы «Бягомльскае» дзяўчына працуе па размеркаванні.
Аляксандра расказвае пра свой графік.
«Пад’ём у мяне штодня а шостай раніцы: памылася, паснедала — і адразу на ферму. Ніякіх макіяжаў, манікюраў… Працоўны дзень — з васьмі да пяці, без выхадных. Такая ў нас спецыфіка, бо сельская гаспадарка не чакае. Асноўная задача — накарміць кароў. Да майго трактара прычэплены раздатчык, праз які пры руху жывёле рассыпае кормасумесь».
Аляксандра і сама рамантуе трактар. Працуе яна на невялікім МТЗ-320.2 (36 конскіх сіл), але марыць у будучыні перасесці на нешта больш буйное, у ідэале — на МАЗ. А таксама паступіць ва ўніверсітэт і асвоіць інжынерную прафесію.
Заробак дзяўчыны — у сярэднім каля 2000 рублёў.
У гаспадарцы Аляксандра пазнаёмілася і са сваім маладым чалавекам — механізатарам Іванам Насеннікам.
«Замуж мне яшчэ рана, — кажа дзяўчына. — Разумею, што шлюб і дзіця — гэта вялікая адказнасць. Да 5‑6 гадоў малыя пастаянна павінны быць дома з мамай, пад наглядам. А я пакуль не гатовая сыходзіць з сельскай гаспадаркі, хай і не назаўжды».
Цяпер чытаюць
Беларуска распачала чэлендж «40 спатканняў», але ўжо на сярэдзіне не хавае расчаравання ў мужчынах48
Каментары