Эксперты Сусветнага банка рэкамендуюць Беларусі ўлічваць рызыкі, звязаныя з маштабнай дзяржпадтрымкай прадпрыемстваў, паведаміла 4 лістапада на брыфінгу ў Мінску кіраўнік групы экспертаў СБ па правядзенні ацэнкі эфектыўнасці дзяржаўных расходаў у Беларусі Алена Нікуліна.
«Калі мы знаёміліся з дзяржфінансамі Беларусі, мы для сябе адзначылі, што дзяржпадтрымка ў краіне існуе, яна даволі маштабная, і гэта адрознівае беларускую эканоміку», — адзначыла Нікуліна.
Паводле яе слоў, эфектыўнасць усёй сістэмы дзяржпадтрымкі, якая існуе ў краіне, падчас падрыхтоўкі Сусветным банкам справаздачы аб эфектыўнасці кіравання дзяржфінансамі не аналізавалася. «Тым не менш мы адзначылі, што некаторыя формы такой падтрымкі ствараюць істотныя макрафінансавыя рызыкі для эканомікі. Наша рэкамендацыя заключаецца ў тым, што гэтыя рызыкі неабходна абавязкова ўлічваць і аналізаваць», — падкрэсліла Нікуліна.
Рызыкі звязаныя з тымі формамі падтрымкі, якія маюць квазіфіскальны характар, дадала яна.
«Калі гаворка ідзе пра сродкі бюджэту, то тут працэс распараджэння імі пастаўлены ў Беларусі на добрую аснову. Калі ж мы гаворым пра аперацыі, якія маюць квазіфіскальны характар і наўпрост не адлюстраваныя ў бюджэце, тут сітуацыя іншая. Нам падалося, што якасць аналізу і маніторынгу такіх аперацый магла быць вышэйшай», — сказала Нуліна.
У сваю чаргу намеснік міністра фінансаў Максім Ермаловіч паведаміў, што Мінэканомікі распрацоўвае праект новай канцэпцыі сістэмы дзяржпадтрымкі ў Беларусі.
«Мы разумеем, што механізмы дзяржпадтрымкі патрабуюць удасканалення, і зараз распрацоўваецца новая канцэпцыя яе аказання, — сказаў ён. — Сёння гаворка ідзе пра тое, што мэта дзяржпадтрымкі — не падтрымка прадпрыемстваў у складаных эканамічных умовах, такі падыход сябе вычарпаў. Сёння неабходна шукаць інструменты, якія будуць спрыяць павышэнню эфектыўнасці працы прадпрыемстваў. Гэта значыць неабходна ўкараняць новыя стымулы ў сістэму дзяржпадтрымкі».
Паводле інфармацыі БелаПАН, план сістэмных мер па збалансаваным развіцці эканомікі ў 2014—2015 гадах, які ў жніўні ўхваліў урад, прадугледжвае меры, скіраваныя на перагляд механізмаў дзяржпадтрымкі эканомікі. У прыватнасці дакумент прадугледжвае адмову ад індывідуальных форм падтрымкі дзяржаўных прадпрыемстваў.
Цяпер чытаюць
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім10
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»3232
Каментары