У гэтым годзе адзначаецца 70-я гадавіна вызвалення савецкімі войскамі самага вялікага нацысцкага лагера смерці Аушвіц-Біркенау (па-польску вядомага як Асвенцім). У 2005 Генеральная Асамблея ААН прыняла рэзалюцыю аб тым, што 27 студзеня – у дзень вызвалення Аушвіц-Біркенау — будзе адзначацца Міжнародны дзень памінання ахвяраў Халакосту.
Афіцыйныя прадстаўнікі 38 краінаў маюць узяць удзел у мерапрыемствах 27 студзеня.
Узровень самы розны: амбасадары (Аргенціна, Кіпр, Эстонія), прадстаўнікі манархій (Бельгія, Данія, Нарвегія, Нідэрланды, Швецыя), кіраўнікі краін (Аўстрыя, Германія, Украіна). Расія павысіла свой узровень з амбасадара ў Польшчы да намесніка прэм’ер-міністра Сяргея Іванова.
Да гэтага часу Беларусь на мерапрыемствах у Аушвіцы не прадстаўляе ніхто. Невядома, ці такое прадстаўніцтва будзе ўвогуле.
Арганізатары стварылі анлайнавую мапу мерапрыемстваў, прысвечаных гадавіне вызвалення Аушвіца, якія праводзяцца па ўсім свеце. На сёння ў гэтым пераліку пазначаны 32 краіны разам з апісаннем запланаваных мерапрыемстваў, часта іх праводзіцца больш за адно. Беларусь не пазначана і ў гэтым пераліку. Гэта не азначае, што такія мерапрыемствы ў Беларусі не запланаваны, аднак стваральнікам мапы пра гэта нічога невядома. Адпаведную інфармацыю можна даслаць ім наўпрост і яна будзе дадзена да агульнага пераліку.
У сацыяльных сетках шмат абмяркоўваюць абставіны непрыезду Пуціна на мерапрыемствы ў Аушвіцы. Аднак ніхто больш не задаецца пытаннем пра прадстаўленасць Беларусі ці, дакладней, яе адсутнасць. Шматгадовая самаізаляцыя рэжыму Лукашэнкі адвучыла ад думкі, што кіраўнік дзяржавы павінен прысутнічаць на такіх мерапрыемствах. У мінулым годзе Беларусь гэтаксама не брала ўдзел у мерапрыемствах з нагоды 70-й гадавіны высадкі войскаў саюзнікаў у Нармандыі. Выглядае, што і перад беларускай дыпламатыяй такія задачы не ставяцца. Пры належнай настойлівасці атрымаць запрашэнне для амбасадара ці прадстаўніка парламента не з’яўляецца невырашальнай праблемай.
Адсутнасць афіцыйных прадстаўнікоў Беларусі на мерапрыемствах у Аушвіцы – ганебны факт, які павінен быць выпраўлены.
Цяпер чытаюць
Колькасць ахвяр выбуху ў маскоўскім элітным рэстаране на юбілеі генерала, які камандаваў наступам на Кіеў з Беларусі ў 2022-м, вырасла да пяці чалавек44
Каментары