У беларускае заканадаўства плануецца ўвесці норму аб магчымасці абарачэння судовага спагнання на элітнае жыллё, паведаміў міністр юстыцыі Алег Сліжэўскі 17 лютага на прэс-канферэнцыі ў Мінску.
Паводле яго слоў, адпаведная норма прадугледжаная распрацаваным законапраектам «Аб выканаўчых вытворчасцях».
«Сёння ёсць праблема, калі ў даўжніка няма заробку і іншай маёмасці, на якую можна накласці спагнанне, але разам з тым ён жыве ў дастаткова фешэнебельным раёне ў добрым катэджы. На сёння заканадаўства абмяжоўвае права спагнання на такую нерухомую маёмасць», — зазначыў Сліжэўскі.
Паводле слоў міністра, у новым законапраекце прадугледжаная магчымасць абарачэння спагнання ў тым ліку на элітнае жыллё. «Безумоўна, з гарантыямі, што ўсе нормы сацыяльныя, прадугледжаныя заканадаўствам у выглядзе забяспечанасці 20 кв. метрамі на аднаго чалавека, будуць захоўвацца. Такім чынам, або частка маёмасці будзе прадавацца, або рэалізоўвацца з выдзяленнем менш камфартабельнага жылля», — сказаў ён.
Сліжэўскі падкрэсліў, што гэтыя меры будуць скіраваныя «на больш эфектыўнае і найхутчэйшае выкананне судовых рашэнняў».
Каментары