«Чаму б не працягнуць Zoom». Дызайнерка з Кіева выпадкова зняла прылёт расійскага дрона падчас анлайн-заняткаў
Увечары ў панядзелак расійскі ўдарны дрон выбухнуў каля 25‑павярховага жылога дома ў Кіеве. У гэты момант дызайнерка Лізавета Браўн праводзіла анлайн-заняткі і выпадкова зафіксавала выбух на відэа. Яе рэакцыя на прылёт стала віруснай у сацыяльных сетках.
Радыё Свабода пагаварыла з Лізаветай Браўн пра тое, што адбывалася ў тыя хвіліны і чаму яна спачатку нават не ўсвядоміла, наколькі небяспечнай была сітуацыя.
«Я жывая, усё нармальна. Чаму б не працягнуць Zoom?»
Падчас заняткаў Лізавета была на сваім звычайным працоўным месцы ў кватэры. Анлайн-сустрэча толькі пачалася.
Удзельнікі далучаліся да званка, калі ў Кіеве абвясцілі паветраную трывогу. Выбух супаў з паветранай трывогай, і часу, каб усвядоміць небяспеку, практычна не было.
«Дзесьці праз чатыры хвіліны пасля пачатку званка пачынаецца трывога. І ў тую ж хвіліну я бачу, як нешта ляціць. Я гляджу збоку і нават не разумею, у які бок яно рухаецца, бо мне здаецца, што гэта яшчэ вельмі далёка. Але літаральна праз дзве секунды ўжо адбываецца прылёт — зусім побач», — расказвае Лізавета.
На відэа, якое разышлося па сацыяльных сетках, Лізавета эмацыйна рэагуе на тое, што адбылося, але пры гэтым спрабуе працягваць размову з удзельнікамі анлайн-заняткаў. Людзі, якія былі з ёю на сувязі, прапаноўвалі спыніць званок і перанесці сустрэчу.
Сама Лізавета ў той момант успрымала сітуацыю інакш.
«Калі адбыўся прылёт, я перабіла чалавека і на эмоцыях спрабавала нешта сказаць. Мяне спрабавалі спыніць: «Окей, Ліза, давай працягнем пазней, перанясем Zoom». Але для мяне ў той момант усё выглядала так, быццам нічога не адбылося. Ну, я ж жывая, усё нармальна. Чаму б не працягнуць Zoom?» — кажа яна.
Паводле Лізаветы, збоку яе рэакцыя магла выглядаць так, нібыта яна застаецца спакойнай і нават весяліцца. Аднак яна сама тады не цалкам усведамляла, што адбываецца. На яе стан маглі ўплываць адрэналін і шок пасля выбуху.
«Я вельмі эмацыйна спрабавала паказаць, што ў мяне ўсё цудоўна і што мы можам працягваць. Але ў кватэры ўжо быў дым. Магчыма, праз гэта я таксама яшчэ не ўсё разумела», — расказвае дызайнерка.
Анлайн-заняткі працягваліся ўсяго каля васьмі хвілін. Пасля выбуху Лізавета не адразу спыніла званок: ёй здавалася, што калі яна сама не пацярпела, то можна вярнуцца да працы.
Яна перайшла ў ванны пакой і вырашыла, што сустрэчу ўсё ж трэба перанесці. Прыкладна праз чатыры-пяць хвілін пасля заканчэння званка Лізавета паведаміла ўдзельнікам, што заняткі адбудуцца ў іншы дзень.
«Для мяне гэта выглядала так, быццам усё добра: я выжыла, стаю ў ванным пакоі, трывога ўжо скончылася. Я проста падумала, што мы можам працягнуць Zoom. Хоць людзі бачылі, што са мной нешта не так», — кажа яна.
Цяпер Лізавета разумее, што для гледачоў відэа яе рэакцыя магла выглядаць зусім інакш, чым яна сама адчувала сябе ў той момант.
«Калі ты перажываеш такія падзеі, а потым пачынаеш усведамляць, у якой сітуацыі апынулася, гэта даволі страшна», — прызнаецца яна.
Нягледзячы на выбух побач з домам, Лізавета не пацярпела. Яна кажа, што ёй вельмі пашанцавала: вокны ў кватэры засталіся цэлымі.
«Я сяджу на тым самым месцы. Тут усё цудоўна. Мне вельмі пашанцавала, што вокны не выбіла. У мяне цалкам цудоўны настрой і са мной усё добра», — сказала яна пасля здарэння.
Цяпер чытаюць
У Мінску прадаюць дом на вадзе. Колькі просяць за незвычайны аб'ект на Чыжоўскім вадасховішчы?3
Каментары