Упершыню ў Беларусі праведзена аперацыя па трансплантацыі лёгкага, паведаміў галоўны пазаштатны анестэзіёлаг-рэаніматолаг Міністэрства аховы здароўя, кіраўнік аддзела анестэзіялогіі і рэанімацыі РНПЦ «Трансплантацыі органаў і тканак» Аляксандр Дзядзько 24 лютага ў Мінску на нарадзе па выніках працы за 2014 год.
Аперацыя прайшла 22 лютага, стан пацыенткі стабільны. «Будзем спадзявацца, што да поспехаў (службы анестэзіялогіі і рэанімацыі) далучыцца яшчэ трансплантацыя лёгкіх», – сказаў Дзядзько.
У Беларусі першую аперацыю па трансплантацыі лёгкага планавалася правесці ў другой палове 2013 года. У РНПЦ трансплантацыі органаў і тканак створана спецыяльнае аддзяленне для правядзення такіх аперацый, урачы прайшлі стажыроўку ў Аўстрыі. Сфарміраваны ліст чакання з пацыентаў, якія маюць патрэбу ў аперацыі. У яго ўваходзяць больш за 10 чалавек.
Сярод прычын, якія не дазволілі правесці перасадку лёгкага раней, Дзядзько назваў праблемы штучнай вентыляцыі лёгкіх донараў. «У працэсе падрыхтоўкі да ампутацыі лёгкага (для далейшага выкарыстання ў якасці донарскага) мы сутыкнуліся з праблемай, калі на працягу года не маглі забраць якасны орган. Раптоўна выяўляюцца разрывы, ёсць траўмы. Лёгкія не прыгодныя для перасадкі», — расказаў спецыяліст.
У РНПЦ трансплантацыі органаў і тканак выконваюцца аперацыі па перасадцы печані, нырак, падстраўнікавай залозы. Колькасць перасадак органаў павялічваецца. З моманту стварэння ў сакавіку 2010 і па снежань 2014 года тут выкананы 292 трансплантацыі печані (у тым ліку 37 дзецям) і 74 — падстраўнікавай залозы.
Паводле звестак камітэта па ахове здароўя Мінгарвыканкама, у 2014 годзе ў РНПЦ было праведзена 70 перасадак печані (у 2013-м — 65, 2012-м — 52, 2011-м — 43, 2010-м — 32, 2009-м — 25, 2008-м — 9). Нырка была перасаджана 163 пацыентам (у 2013-м — 190, 2012-м — 161, 2011-м — 160, 2010-м — 115, 2009-м — 100, 2008-м — 70, 2007-м — 40, 2006-м — 20).
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»23
Каментары