Пасол Еўрасаюза ў Расіі Вігаўдас Ушацкас кажа, што пастаўкі зброі Украіне былі б рызыкоўным крокам, калі мець на ўвазе магчымы адказ з боку Расіі.
У апублікаваным у панядзелак інтэрв'ю літоўскай дзелавой газеце Verslo zinios дыпламат сказаў, што, прымаючы рашэнне пра ваенную падтрымку, асобныя краіны павінны з усёй адказнасцю ўзважыць магчымыя дзеянні Масквы.
«Наколькі я разумею, адміністрацыя ЗША занепакоеная тым, якія будуць наступствы, калі будзе прадастаўлена ваенная дапамога, вайсковая тэхніка, якім можа быць адказ Расіі і як канкрэтна ён выявіцца на тэрыторыі Усходняй Украіны», — сказаў газеце Ушацкас.
«Гэта вельмі сур'ёзныя пытанні, бо рызыка і пагрозы рэальныя», — дадаў былы міністр замежных спраў Літвы.
Літва публічна, аднак без падрабязнасцяў, пацвердзіла, што перадала Украіне элементы ўзбраення. Прэзідэнт і прэм'ер-міністр Літвы не раз публічна заклікалі краіны Захаду дапамагчы Кіеву зброяй.
Самая ўплывовая краіна ЕС — Германія выказваецца супраць паставак зброі. Кіраўнік МЗС Франк-Вальтэр Штайнмаер нядаўна папярэдзіў, што ў выпадку прадастаўлення Кіеву дапамогі вайсковымі сродкамі «канфлікт можа быць пераведзены ў новую фазу» і можа разгарэцца «небяспечная пастаянная эскалацыя паміж Украінай і Расіяй».
Кангрэс ЗША выказваецца за пастаўкі зброі, сцвярджаючы, што гэта дапаможа ўраду Украіны «абараніць сваю суверэнную тэрыторыю ад несправакаванай і працяглай агрэсіі Расійскай Федэрацыі». Прэзідэнт ЗША Барак Абама пакуль устрымліваецца ад паставак зброі, але не выключае такой магчымасці ў будучыні.
Захад сцвярджае, што Расія пасылае ўзбраенні і вайскоўцаў у дапамогу сепаратыстам, што ваююць на ўсходзе.
Па словах В. Ушацкаса, ЕC павінен падтрымліваць эканамічныя і палітычныя рэформы ва Украіне, стабілізаваць краіну, але адначасова трэба «быць рэалістамі і шукаць агульныя падыходы, як можна пры дапамозе перамоваў з Расіяй спыніць эскалацыю канфлікту», уключаючы перамовы аб пастаўках зброі.
«(…) Трэба прызнаць, што мы не пойдзем ваяваць і паміраць за Украіну і мы не пойдзем мяняць Расію, бо мы гэтага не зробім», — сказаў дыпламат.
В. Ушацкас паўтарыў, што ў залежнасці ад сітуацыі на Усходзе Украіны ЕС гатовы ўвесці дадатковыя санкцыі ці іх адмяніць.
Апытанка
Прапагандысты запэўніваюць, што 196 палітвязняў ужо на свабодзе7
Каментары