Чацвёртая экспазіцыя выставачнага праекта «Мастак і горад» прысвечана творчасці аднаго са знакавых беларускіх мастакоў другой паловы XX ст. — Міколы Селешчука.
Як распавялі ў Цэнтры сучасных мастацтваў, на пл. Якуба Коласа будуць прадстаўлены рэпрадукцыі 30 карцін з калекцый Нацыянальнага мастацкага музея, Музея сучаснага выяўленчага мастацтва, Беларускага саюза мастакоў, Магілёўскага абласнога мастацкага музея імя. П.В. Масленікава і прыватных калекцый.
«Мікола Селяшчук — яркі самабытны мастак. Яго творчасць яшчэ да канца не асэнсаваная. Пайшоў з жыцця, калі яму не споўнілася 50 гадоў. Многія яго працы знаходзяцца ў прыватных калекцыях, гэта значыць не даступныя шырокаму колу. Праект «Мастак і горад» дасць магчымасць убачыць некаторыя з іх», — кажа дырэктар Цэнтра сучасных мастацтваў Наталля Шаранговіч.
Мікола Селяшчук — графік, ілюстратар, жывапісец, прыкметная фігура школы беларускага сюррэалізму. Працы мастака не аднаразова адзначаныя на рэспубліканскіх і міжнародных конкурсах выяўленчага мастацтва. Лаўрэат Дзяржаўнай прэміі Рэспублікі Беларусь. Трагічна пайшоў з жыцця ў 1996 годзе.
Нагадаем, выставачны праект «Мастак і Горад» чацвёрты год запар рэалізуецца ў Мінску пры падтрымцы Міністэрства культуры Рэспублікі Беларусь і Мінскага гарадскога выканаўчага камітэта. Папярэднія экспазіцыі, прадстаўленыя на пл. Якуба Коласа, знаёмілі з творчасцю Марка Шагала, Казіміра Малевіча і сучасных беларускіх жывапісцаў і графікаў.
Сёлета ініцыятарамі выставачнага праекта выступілі агенцтва сацыяльнага маркетынгу Grand BS і Цэнтр сучасных мастацтваў. А генеральным партнёрам другі год запар стаў банк ВТБ. Інфармацыйныя партнёры: агенцтва «Мінск-Навіны», гарадскі часопіс «Большой» і партал Relax.by.
Выстава будзе працаваць з 14 мая па 10 верасня.
Цяпер чытаюць
Былога вайскоўца з Брэста, які вярнуўся з Польшчы, абвінавацілі ў «тэрарызме» і адправілі ў калонію1
Каментары