4 лютага на памежным пераходзе «Каменны Лог» лідэру АГП пагранічныя службы Беларусі не дазволілі перасячы мяжу і паставілі ў пашпарце штамп з надпісам «У выезьдзе адмоўлена».
Такім чынам, А.Лябедзька не змог выехаць у Літву, дзе 4 лютага ў яго быў запланаваны шэраг сустрэч з дэпутатамі сейма.
«Мяне хвілін 40 трымалі на мяжы, на пагранічным пераходзе. То прапаноўвалі ў аўтамабілі пасядзець, то тэлефанавалі камусьці. Таму я цалкам упэўнены ў тым, што памежнікі тэлефанавалі ў Мінск, і рашэнне аб тым, каб мяне не выпускаць, было прынята на дастаткова высокім узроўні», — паведаміў А.Лябедзька.
«Усе праблемы з маім выездам за мяжу пачаліся пасля таго, як мы наведалі Вашынгтон і сустракаліся там з Джорджам Бушам. І іншыя сустрэчы былі на такім жа высокім узроўні. Відаць, камусьці не падабаецца, што апазіцыянераў сустракаюць на такім узроўні, а кіраўніку дяржавы на такі ўзровень шляху няма», — зазначыў А.Лябедзька.
Цяпер лідэр АГП знаходзіцца ў памежным горадзе Ашмяны (Гродзенская вобласць). «У мяне і цяпер ёсць у Беларусі маса спраў. Я думаю, што кампенсую маю паездку, якая не адбылся, працай у рэгіёнах», — заявіў А.Лябедзька.
Нагадаем, на пачатку 2008 года А.Лябедзька атрымаў паведамленне аб забароне на выезд з Беларусі. Рашэнне было прынята на падставе крымінальнай справы, распачатай у дачыненні да яго пракуратурай Мінска. Справа была адкрыта ў 2004 годзе на падставе ч. 2 арт. 367 Крымінальнага кодэкса (паклёп у дачыненні да прэзідэнта Беларусі) пасля інтэрв\’ю партыйнага лідэра праграме «Люстра» (тэлеканал «Расія») і публікацыі ў газеце «Народная воля» на тэмы «ценявога» бюджэту і гандлю зброяй.
Раней начальнік следчага ўпраўлення пракуратуры, на прыёме ў якога быў А.Лябедзька, падкрэсліў, што не мае прававых падстаў абмяжоўваць перамяшчэнне лідэра АГП.
Каментары