Лідэр Партыі рэгіёнаў Віктар Януковіч: Датэрміновыя выбары «не за гарамі». Аналітык Міжнароднага цэнтра пэрспэктыўных дасьледаваньняў Іван Прэсьнякоў: Для гэтага няма законных падставаў.
Р. Зварыч абвергнуў словы прадстаўнікоў апазыцыйных фракцыяў наконт таго, што прэзыдэнт ня мае права на працягу аднаго года пасьля правядзеньня датэрміновых выбараў распускаць парлямэнт.
«У Канстытуцыі запісана, што прэзыдэнт насамрэч ня можа распускаць парлямэнт на працягу аднаго года. Аднак ва ўказе прэзыдэнта, паводле якога былі праведзеныя датэрміновыя выбары, няма спасылкі на тое, што датэрмінова спыняюцца паўнамоцтвы ВР», ‑‑ заўважыў дэпутат.
Паводле Зварыча, прэзыдэнт у сваім указе канстатаваў адсутнасьць паўнамоцтваў Вярхоўнай Рады.
Лідэр Партыі рэгіёнаў Віктар Януковіч на паседжаньні ценявога ўраду таксама заявіў пра магчымыя датэрміновыя выбары. Ён адзначыў, што ў сёньняшнім выглядзе парлямэнцкая кааліцыя недзеяздольная, а таксама зьвінаваціў дзеючую ўладу ў непрафэсіяналізьме. Акрамя таго, лідэр ПР ня выключыў магчымасьці звальненьня старшыні Вярхоўнай Рады Арсеня Яцэнюка. Раней дэпутат Уладзімер Літвін паведаміў, што Рада можа прыняць рашэньне пра самароспуск.
У сваю чаргу аналітык Міжнароднага цэнтру пэрспэктыўных дасьледаваньняў Іван Прэсьнякоў выказаў думку, што для роспуску Вярхоўнай Рады VI скліканьня няма няма законных падставаў: «Паводле Канстытуцыі нельга праводзіць датэрміновыя парлямэнцкія выбары на працягу аднаго года пасьля правядзеньня папярэдніх датэрміновых выбараў у ВР». Ён дадаў, што працэдура самароспуску парлямэнту Канстытуцыяй таксама не прадугледжана.
Чарговы парлямэнцкі крызыс ва Ўкраіне пачаўся 25 студзеня, калі дэпутаты ад Партыі рэгіёнаў блякавалі працу Рады. Нагодай паслужыла дыскусія адносна працэдуры далучэньня Ўкраіны да NATO. Украінскі парлямэнт дагэтуль ня можа распачаць працу праз блякаваньне трыбуны і сэсійнай залі. Сьпікер Рады А. Яцэнюк здолеў толькі закрыць першую і абвесьціць пра пачатак другой сэсіі ВР.
Нагадаем, што першы ў гісторыі нашай паўднёвай суседкі роспуск парлямэнту адбыўся 2 красавіка 2007 г. Аб спыненьні паўнамоцтваў Вярхоўнай Рады і прызначэньні пазачарговых выбараў прэзыдэнт краіны Віктар Юшчанка абвесьціў у прамым этэры агульнанацыянальных тэлеканалаў.
У выніку 30 верасьня мінулага году выбары адбыліся і былі прызнаныя сусьветнай супольнасьцю. Была сфармаваная прапрэзыдэнцкая парлямэнцкая кааліцыя і Кабінэт міністраў з Юліяй Цімашэнка на чале.
Каментары