Былы прэзідэнт СССР Міхаіл Гарбачоў прызнаў, што антыалкагольная кампанія ў сярэдзіне 1980-х праводзілася з памылкамі. Пра гэта ён заявіў у інтэрв'ю «Камсамольскай праўдзе», апублікаваным у пятніцу.
«Лічу, што антыалкагольная кампанія ўсё-такі была памылкай у тым выглядзе, як яна праводзілася. Гэта перагібы з закрыццём крам, асабліва ў Маскве. Вялізныя чэргі. Рост самагонаварэння. Цукар знік з крамаў», — сказаў Гарбачоў.
На думку былога савецкага лідара, рэалізоўваць антыалкагольную кампанію варта было паступова. «Трэба было праводзіць не кампанію, а планамерную доўгатэрміновую барацьбу з алкагалізмам. Выцвярозванне грамадства нельга праводзіць наскокам. На гэта патрэбныя гады. І змагацца трэба бесперапынна, увесь час», — заявіў Гарбачоў
У той жа час былы прэзідэнт адзначыў, што алкагольная кампанія пачала планавацца яшчэ пры генсеку Л.Брэжневе і была неабходная, бо краіну захлынула п'янства. Паводле яго слоў, кампанія прынесла свае станоўчыя вынікі. «Зніжэнне смяротнасці, дзяцей стала больш нараджацца. Падчас антыалкагольнай кампаніі памерла на 1,6 мільёна чалавек менш, чым у папярэднія гады. Рэзка скарацілася колькасць няшчасных выпадкаў на вытворчасці, на дарогах», == нагадаў Гарбачоў.
7 мая 1985 года была апублікавана знакамітая пастанова ЦК КПСС «Аб мерах па пераадоленні алкагалізму», з якога пачалася антыалкагольная кампанія. Спіртныя напоі сталі прадавацца толькі ў буднія дні з 14 да 16 гадзін дня.
Спажыванне алкаголю ў краіне знізілася нязначна, пры гэтым рэзка вырасла вытворчасць сурагатнага спіртнога, што прыводзіла да выпадкаў масавага атручвання. Акрамя таго, кампанія рэзка ўдарыла па бюджэце СССР, пазбавіўшы яго значнай часткі даходу. Масавая незадаволенасць кампаніяй і эканамічны крызіс, што пачаўся ў 1987 г. вымусілі кіраўніцтва СССР негалосна згарнуць барацьбу з п'янствам.
Каментары