Моладзь можа не верыць, але ў яго былі гады стабільнасці і росту.
Нядаўна беларускі рубель зноў пабіў гістарычны рэкорд: калі не лічыць дэнамінацыі-2000, за даляр яшчэ не давалі больш за 15,5 тысяч.
«Падае і падае, ды калі ён рос?» — можна пачуць ад людзей. А ён рос.
Яшчэ нядаўна, з лютага па сярэдзіну мая, беларускі рубель стабільна рос да даляра. З 15 450 курс даляра знізіўся да 14 040, але затым развярнуўся і дайшоў да ўчорашніх рэкордных 15 488 рублёў за даляр.
Рубель нязначна і нядоўга рос пасля крызісу 2011 года — з лістапада-2011 (8 850 за даляр) па май-2012 (8 010), а таксама час ад часу ў 2009—2010 гадах (праўда, у межах ваганняў на ±5%).
Доўгі перыяд сапраўднай стабільнасці і нават нязначнага росту курсу рубля да даляра прыходзяцца на 2005-2007 гады. Тады ўсе ведалі на памяць лікі 2 150, а затым і 2 140.
Праўда, пасля элегантных выбараў 2006 года валавы замежны доўг Беларусі пайшоў у заўважны (і няспынны) рост, а ў хуткім часе скончылася паласа стабільнасці беларускага рубля.
На самой справе, вызначаць курс рубля толькі па даляры не зусім карэктна — пасля навагодняй дэвальвацыі 2009 года Нацбанк перайшоў на прывязку рубля да кошыку валют (даляр, еўра, расійскі рубель). Тым не меней, да кошыку рубель з таго часу не асабліва рос.
Ад пачатку свайго існавання да сённяшняга дня беларускі рубель патаннеў больш чым у 100 тысяч раз.
З 2000 года беларускі рубель стаў таннейшы ў амаль 50 раз, з 320 рублёў за даляр да сённяшніх 15,5 тысяч. Калі ж лічыць з 1995 года (улічваючы дэнамінацыю-2000), — у 1332 разы. А калі з яго ўвядзення ў абарот летам 1992-га — ва ўсе 119 тысяч раз.
Глядзіце таксама: Беларускія талеры: фантазія «Нашай Нівы»
Каментары