У Мінску ствараецца першая ў рэспубліцы сетка кантактных заапаркаў «Краіна Яноція», жывёл у якіх можна будзе гладзіць, карміць і нават грыміраваць. Незвычайныя ўстановы адкрыюць гэтым летам у гандлёва-забаўляльных цэнтрах «Тытан» і «Цівалі», паведамілі ў камунікацыйным агенцтве АГТ.
«Краіна Яноція» будзе налічваць каля дзесяці ўстаноў у розных месцах Мінска. Афіцыйную цырымонію адкрыцця першых такіх заапаркаў плануецца правесці бліжэй да восені, але працаваць яны пачнуць раней. Так, у ГЗЦ «Тытан» на праспекце Дзяржынскага аматараў жывёл чакаюць у сярэдзіне ліпеня, а ў ГЗЦ «Цівалі» на вуліцы Прытыцкага — у пачатку жніўня.
Плошча кожнага такога заапарка перавысіць 300 кв.м. У вальерах адкрытага тыпу размесцяцца поні, камерунскія козы, авечкі і альпакі. Таксама ўсе жадаючыя змогуць пагладзіць і пакарміць марскіх свінак, трусоў, вавёрак, капібар і малпаў. Сярод жывёл можна будзе ўбачыць янотаў (насух і паласкуноў), кенгуру, лемураў, янотападобных сабак і афрыканскіх вожыкаў. З птушак прапануюць патрымаць у руках качак-мандарынак, пакарміць лебедзяў, дэкаратыўных курэй, хвалістых папугаяў, какарыкаў і амадзінаў.
Усяго ж у кантактным заапарку будзе прадстаўлена каля 30 відаў звяроў і птушак. Каля 90 працэнтаў жывёл можна будзе пагладзіць, пакарміць і пафарбаваць з дапамогай аквагрыму. Асобнае месца ў заапарку выдзеляць для дзіцячай творчасці, дзе дзеці змогуць памаляваць, паўдзельнічаць у розных майстар-класах, паглядзець мультфільмы. Святочную атмасферу створыць аніматар.
Кожны заапарк аформяць у пэўным стылі. Так, у «Тытане» будзе абыграна анімацыя «Сямейка Крудс», што нагадае арэал пражывання першабытнай сям'і, а заапарк у ГЗЦ «Цівалі» ўзновіць пустынны пейзаж.
Асноўнай сваёй аўдыторыяй уладальнікі сеткі называюць дзяцей ва ўзросце ад 3 гадоў, але абяцаюць, што цікавым наведванне заапарка стане і для дарослых. Дарэчы, жывёл можна будзе ўбачыць і па-за ўстановай, напрыклад, на навучальных семінарах у школах і дзіцячых садах. Акрамя таго, у планах — сеансы іпатэрапіі, а таксама дабрачынныя акцыі для дзяцей з абмежаванымі магчымасцямі.
Цяпер чытаюць
«Калі шандарахне па цягніку, хто будзе лідарам дэмсіл?» Два дні з дэлегацыяй Ціханоўскай у Кіеве — што засталося за кадрам18
Каментары