Праўда, праект плануюць не гарадскія ўлады ці «Белтэлекам», а «Альфа-Банк».
Прэс-служба «Альфа-банка» абвясціла пра планы па ўсталёўцы арт-лаўкі з бясплатным Wi-Fi у Мінску. Час і месца ўсталёўкі пакуль не называюцца.
Агромістая лаўка-прышчэпка мастака Ігара Лявонцьева, якую сёння можна пабачыць на «Арт-астравах», будзе дапоўненая Wi-Fi-роўтарам і выстаўленая недзе ў сталіцы.
«Мы разглядаем розныя варыянты: ад размяшчэння ў буйных аб’ектах накшталт тэрміналу нацыянальнага аэрапорта ці будынка чыгуначнага вакзала да ўсталёўкі на ажыўленай вуліцы, у скверы ці парку», — тлумачыць дырэктар дэпартамента маркетынгу «Альфа-Банка» (Беларусь) Кацярына Краўцова.
Лаўка будзе знаходзіцца на «Арт-астравах» да закрыцця праекта у верасні, пасля гэтага яе «пераселяць». Лаўка-прышчэпка сімвалізуе «мяняльныя лаўкі» і, як кажуць у банку, можа выконваць падобную функцыю: праз інтэрнэт можна ў тым ліку праверыць рахунак, аплочваць тавары і паслугі, праводзіць розныя банкаўскія аперацыі.
Сцвярджаецца, што хуткасць і стабільную якасць злучэння забяспечыць «адзін з буйных аператараў сувязі». Спосаб ідэнтыфікацыі карыстальніка пакуль не абраны: можа быць выкарыстаная камера відэаназірання ці парольны доступ (напрыклад, праз логін-пароль да інтэрнэт-банкінгу для кліентаў банка і SMS для ўсіх астатніх).
***
Практычна ўся Беларусь пакрытая платным Wi-Fi-сецівам «Белтэлекама». Арганізацыя бясплатных вулічных Wi-Fi-сетак стала праблематычнай пасля «ўказа 60», што ўвёў патрабаванне аб абавязковай ідэнтыфікацыі карыстальнікаў.
Бясплатны вулічны Wi-Fi нядаўна з’явіўся ў Магілёве, ідэнтыфікацыя карыстальніка адбываецца праз бясплатнае SMS. Абсталяваць свае аўтобусы бясплатным Wi-Fi абяцае адна з найбуйнейшых транспартных арганізацый Беларусі, Мінаблаўтатранс.
Мінгарвыканам абяцаў паставіць лаўкі з інструкцыямі па падключэнні да платнай Wi-Fi-сеткі «Белтэлекам» спачатку да Чэмпіянату свету па хакеі ў 2014 годзе, затым адну лаўку пад ратушай на пл. Свабоды да канца мая 2015 года.
Цяпер чытаюць
Мінчанка Ангеліна, якая прасіла ў Лукашэнкі кватэру за тройню, атрымала жыллё18
Каментары