Продаж беларускіх «МАЗаў» у Расіі скараціўся ў два разы, сведчаць звесткі расійскага аналітычнага агенцтва «Аўтаста», якое спецыялізуецца на вывучэнні рынку транспартных сродкаў РФ.
Аб'ём расійскага рынку новых грузавых аўтамабіляў поўнай масай большай за 3,5 тоны ў лістападзе 2015 года склаў 4,1 тыс. адзінак. У параўнанні з аналагічным месяцам 2014 года продаж грузавых аўтамабіляў у Расіі знізіўся на 32%. Падзенне продажу грузавых аўтамабіляў вытворчасці Мінскага аўтамабільнага завода стала яшчэ большым — у лістападзе гэтага года ў параўнанні з лістападам мінулага продаж скараціўся на 53,6%. У апошні восеньскі месяц у Расію было прададзена 266 новых «МАЗаў».
Усяго за студзень—лістапад 2015 года на расійскім рынку быў прададзены 3.241 грузавы аўтамабіль беларускай вытворчасці, што на 54,4% менш у параўнанні з такім жа леташнім перыядам, паведамляе «Аўтастат».
Трэба адзначыць, што продаж прадукцыі аднаго з асноўных канкурэнтаў МАЗа на рынку РФ — расійскага КАМАЗа — таксама знізіўся, але ў меншай ступені. Так, за 11 месяцаў года камскі аўтазавод прадаў 15.281 грузавы аўтамабіль на ўнутраным рынку, што на 35,2% менш у параўнанні з аналагічным перыядам 2014 года.
Паводле вынікаў продажу за студзень—лістапад доля КАМАЗа на расійскім рынку склала 33,7% (годам раней — 29,8%), доля МАЗа — 7,1% (9%).
Сітуацыя на беларускіх машынабудаўнічых прадпрыемствах, у якіх істотна знізіўся продаж, разглядалася ў сярэдзіне года на нарадзе з удзелам Аляксандра Лукашэнкі. Кіраўнік дзяржавы запатрабаваў, каб на кожным прадпрыемстве былі выпрацаваныя «гнуткія меры ўласнага рэагавання на наяўныя выклікі і пагрозы».
Тым часам па стане на 1 лістапада на беларускіх складах знаходзілася 1.184 нерэалізаваныя грузавыя аўтамабілі, што ў 4,2 разу перавышае сярэднямесячны аб'ём іх вытворчасці.
Цяпер чытаюць
Яму выбілі чатыры зубы, а пасля выкінулі з краіны. Цяпер былога палітвязня арыштавалі ў Латвіі з шасцю мігрантамі ў машыне23
Каментары