Як высветліла «Газета.ru», новы в.а. губернатара Тульскай вобласці Аляксей Дзюмін быў асабістым ад'ютантам Уладзіміра Пуціна ў бытнасць таго прэм'ер-міністрам і адыграў не апошнюю ролю ў далучэнні Крыму да РФ.
У аўторак Уладзімір Пуцін вызваліў ад пасады губернатара Тульскай вобласці мільярдэра Уладзіміра Груздзева, які канфліктаваў з урадам, і прызначыў выконваючым абавязкі кіраўніка рэгіёну намесніка міністра абароны Аляксея Дзюміна.
У студзені Груздзеў, выказваючыся супраць уразання выплат для чарнобыльцаў, публічна запатрабаваў ад кіраўніка Мінфіна РФ Антона Сілуанова растлумачыць тулякам, за што іх пазбаўляюць сродкаў.
Да прызначэння в.а. афіцыйная біяграфія Дзюміна складалася з некалькіх радкоў. Усё жыццё ён прапрацаваў у вайсковых структурах. Быў звычайным афіцэрам аховы ў Службе аховы прэзідэнта ў перыяд папярэдняга прэзідэнцтва Уладзіміра Пуціна. Калі ўрад узначаліў Уладзімір Пуцін, Дзюмін стаў асабістым ад'ютантам прэм'ер-міністра.
Абавязкі ад'ютанта вельмі шырокія, падкрэслівае суразмоўца «Газеты.ru», гэта ўсё — пачынаючы ад пытанняў забеспячэння побыту ахоўнай асобы да забеспячэння бяспекі. «Ад'ютант у прэм'ер-міністра, гэтак жа як і ў прэзідэнта, некалькі. Працуюць пазменна. Суправаджаючы начальніка ў паездках, ад'ютант сядзіць на пярэднім сядзенні машыны, у якой едзе першая або другая асоба краіны».
Дзюмін падчас сваіх дзяжурстваў нават начаваў з тагачасным прэм'ерам ў адным доме.
Пазней Дзюмін, згодна з біяграфіяй, якую прыводзіць ТАСС, камандаваў сіламі спецаперацый ВС РФ. Некалькі крыніц «Газеты.ru» распавялі, што Дзюмін адыграў не апошнюю ролю ў далучэнні Крыму да Расеі.
Ёсць у біяграфіі Дзюміна і яшчэ адзін цікавы момант: ён з'яўляецца старшынёй апякунскай рады і брамнікам Начной хакейнай лігі (НХЛ) і не раз удзельнічаў у матчах з Уладзімірам Пуціным.
Цяпер чытаюць
Брат беларускай каралевы прыгажосці трапіў у рэанімацыю ў Азербайджане6
Каментары