Каля пасольства Расіі ў Мінску прайшоў антырасійскі пікет
Каля будынка пасольства Расіі ў Мінску 2 красавіка прайшоў пікет супраць расійскага шавінізму і імперыялізму. Несанкцыянаваная ўладамі акцыя была прымеркавана да Дня яднання народаў Беларусі і Расіі.
У акцыі, арганізаванай зарэгістраваным у Чэхіі аб'яднаннем «Малады фронт», удзельнічала 12 чалавек. Яны трымалі бел-чырвона-белыя сцягі, сімволіку арганізацыі, а таксама плакаты «Не саюзу з бандай», «Добры сусед — той, які жыве праз плот», «Пуціна ў Гаагу».
Праз пяць хвілін пасля пачатку пікета да яго ўдзельнікаў падышлі супрацоўнікі міліцыі ў форме для складання пратаколаў. Частка пікетоўцаў называлі свае дадзеныя, аднак некаторыя адмаўляліся размаўляць з міліцыянерамі. У прыватнасці, актывіст «Маладога фронту» Зміцер Дашкевіч сказаў, што не разумее рускай мовы, і папрасіў гаварыць з ім па-беларуску. Аднак, верагодна, адміністрацыйны пратакол быў складзены і ў дачыненні да яго.
Актывісты скандавалі лозунгі «Расія — гэта вайна», «Рукі прэч ад Украіны», «Свабоду Надзеі Саўчанцы».
Навакольныя рэагавалі на тое, што адбываецца, па-рознаму. Асобныя машыны сігналілі ў знак салідарнасці, некаторыя прахожыя падыходзілі і дзякавалі ўдзельнікам акцыі. У той жа час некалькі пажылых людзей падышлі да пікетоўцаў і сталі абвінавачваць іх у тым, што яны фашысты і забіваюць людзей ва Украіне.
У каментарыі журналістам пасля акцыі Зміцер Дашкевіч адзначыў: «Натуральна, мы не чакалі, што збярэцца тысяча ўдзельнікаў. Але людзі, якія даведаліся пра нашу акцыю праз сацыяльныя сеткі і палічылі патрэбным прыйсці, яны прыйшлі. Самае галоўнае — гэта ўзвысіць свой голас, сказаць, што беларускае грамадства не прымае саюза з Расіяй. Было б горш, калі б усе маўчалі, а потым па расійскіх каналах расказвалі, як беларусы радасна адсвяткавалі Дзень яднання».
На пытанне, ці сапраўды беларускае грамадства супраць інтэграцыі з Расіяй, калі значная яго частка знаходзіцца пад уплывам расійскай прапаганды ў сувязі з падзеямі ва Украіне, Дашкевіч адказаў: «Я ведаю шмат прыкладаў, калі сярод жыхароў Данбаса некаторыя скрозь пальцы глядзелі на расійска-ўкраінскі канфлікт, але калі прыйшоў «рускі свет», яны памянялі сваё меркаванне і імкнуцца зрабіць так, каб іх дзеці не чулі рускай мовы».
На яго думку, значная частка беларускіх грамадзян таксама зменяць сваё стаўленне да Расіі. «Калі сюды прыйдзе «рускі свет», праявіцца адкрытая агрэсія, то гэта стане каталізатарам творчых працэсаў, і людзі будуць па-іншаму ставіцца да Расіі», — лічыць актывіст «Маладога фронту».
Пры гэтым Дашкевіч ахарактарызаваў рэакцыю ўладаў на пікет, і ў прыватнасці праваахоўнікаў, як нейтральную. «Лукашэнка падабаецца лавіраваць, дагадзіць і Расіі, і Захаду. У прынцыпе, гэта нейтральная рэакцыя, таму што калі мы праводзілі акцыі ў мінулыя гады, нас або лавілі на падыходах да месца, або затрымлівалі падчас мерапрыемства», — сказаў ён.
За акцыяй назірала больш за два дзясяткі супрацоўнікаў сілавых структур у цывільным, некаторыя з іх здымалі тое, што адбываецца, на відэакамеру. Таксама на акцыі прысутнічаў камандзір мінскага АМАПа Дзмітрый Балаба і іншыя прадстаўнікі кіраўніцтва ГУУС Мінгарвыканкама.
Некаторыя з сілавікоў цікавіліся ў журналістаў, хто яны і навошта здымаюць тое, што адбываецца. Пры гэтым праваахоўнікі не называліся, але і якіх-небудзь прэтэнзій не выстаўлялі.
Пікет пачаўся апоўдні і доўжыўся каля паўгадзіны. У канцы акцыі прысутныя праспявалі гімн «Магутны Божа», пасля чаго разышліся. Якіх-небудзь затрыманняў і інцыдэнтаў з міліцыяй не было.
Каментары