Супрацоўнікаў міліцыі на працэсе па «справе 17-ці» дапытаюць у закрытым рэжыме
Супрацоўнікаў галоўнага ўпраўлення па барацьбе з арганізаванай злачыннасцю і карупцыяй МУС Беларусі на працэсе па «справе сямнаццаці» дапытаюць у закрытым рэжыме.
Працэс па справе самай буйной у гісторыі Беларусі групы па распаўсюджванні наркотыкаў працягваецца 5 красавіка ў Мінгарсудзе. На лаве падсудных 17 чалавек.
Начальнік ГУБАЗіК палкоўнік міліцыі Мікалай Карпянкоў накіраваў у суд ліст з просьбай допыт сведак з шэрагу яго супрацоўнікаў правесці ў закрытым рэжыме. Сваю просьбу Карпянкоў аргументаваў тым, што ў зале суда знаходзяцца журналісты, якія могуць паведаміць у СМІ звесткі пра аператыўнікаў і іх працу.
Адвакаты выступілі супраць гэтай просьбы. «Літаральна на днях я глядзеў па тэлевізары перадачу, прысвечаную юбілею ГУБАЗ. Яны давалі інтэрв'ю, не хавалі свае прозвішчы і асобы, таму не бачу перашкодаў дапытаць іх у адкрытым судовым пасяджэнні. Просьба Карпянкова выглядае як жаданне схаваць рэальныя акалічнасці справы», — заявіў адвакат Сяргей Целяжэвіч, які абараняе інтарэсы былога супрацоўніка ГУБАЗіК Канстанціна Дзенісевіча.
«СМІ ўжо даўно паведамілі ўсе прозвішчы, — адзначыла адвакат Ігара Карыцкага, былога супрацоўніка КДБ. — Калі сведкі чагосьці асцерагаюцца, яны могуць схаваць свае асабістыя звесткі. Звяртаю ўвагу, што ні адзін з допытаў супрацоўнікаў ГУБАЗ на папярэднім следстве засакрэчаны не быў».
«Карпянкоў сам неаднаразова даваў інтэрв'ю журналістам аб акалічнасцях справы, — заявіла адвакат абвінавачанага Канстанціна Вілюгі Галіна Раждзественская. — Таму не бачу прычын для задавальнення просьбы, заяўленай у лісце з ГУБАЗ».
Абвінавачаныя аднадушна падтрымалі сваіх абаронцаў. «Свабоду слова!» — крычалі яны з клетак.
Аднак суд, спасылаючыся на закон «Аб дзяржаўных сакрэтах», усё ж такі прыняў рашэнне дапытаць супрацоўнікаў ГУБАЗіК ў закрытым рэжыме. Разам з журналістамі залу суда пакінулі сваякі абвінавачаных. Шэсць чалавек меркавана з ліку работнікаў МУС чакаюць выкліку на допыт каля залы судовага пасяджэння
Цяпер чытаюць
35 маладых беларусаў і беларусак, за якімі варта сачыць: апублікаваны першы спіс Next 3532
Каментары