Еўрапейскі гуманітарны ўніверсітэт (ЕГУ) шчыра запрашае на прэзентацыю кнігі гісторыка і прафесара Дэпартамента гісторыі Генадзя Сагановіча «Грунвальд у беларускай гісторыі: Спроба разбору палітычнага міфа», якая адбудзецца 14 красавіка ў Мінску.
Удзельнікі мерапрыемства гэтаксама змогуць набыць кнігу з подпісам аўтара.
Увага! Мінская прэзентацыя кнігі і адкрытая лекцыя прафесара Г. Сагановіча адбудзецца 14 красавіка (чацвер) а 17 гадзіне ў Мінску ў Арт-сядзібе па адрасе пр-т Незалежнасці 58-430.
Кніга «Грунвальд у беларускай гісторыі: Спроба разбору палітычнага міфа» была выдадзена ў студзені 2016 года выдавецтвам ЕГУ і прысвечана бітве пад Грунвальдам як факту грамадскай свядомасці – яе «пасмяротнаму жыццю» ў гістарычнай думцы і сацыяльнай памяці Беларусі. Выбітны беларускі гісторык, прафесар Г. Сагановіч паспрабаваў выявіць шляхі і абставіны пашырэння ўстойлівых уяўленняў пра бітву 1410 г. у навуковым і публічным дыскурсе, а таксама паказаць іх ідэалагічны змест і грамадска-палітычнае прызначэнне.
Крыніцамі для даследавання паслужылі выданні навуковай гістарыяграфіі, навучальная літаратура і гістарычная публіцыстыка, а таксама рэлевантныя творы беларускай белетрыстыкі. Сабраны эмпірычны матэрыял аналізаваны з улікам шырокага міжнароднага кантэксту актуалізацыі памяці пра Тэўтонскі ордэн, а таксама ў сувязі з ідэалагічнымі канцэптамі польскага Грунвальда і нямецкага Таненберга. Асобная ўвага прысвечана практыкам ідэалагічнай інструменталізацыі бітвы ў Савецкім Саюзе, якія ў многім і прадвызначылі фармаванне афіцыйнай памяці пра бітву ў БССР. З даследавання вынікае, што комплекс ідэй і перакананняў, ідэнтыфікаваных у кнізе як беларускі міф Грунвальдскай бітвы, пачаў фармавацца толькі ў савецкую эпоху.
Яе вытокі звязваюцца з дыскурсам антынямецкай прапаганды ўзору Вялікай Айчыннай вайны. Аўтар спадзяецца, што праца можа дапамагчы шырокаму колу чытачоў лепш зразумець ідэалагічнае паходжанне і анахранічнасць сімвалічнага зместу асноўнага наратыва пра Грунвальдскую бітву, пашыранага ў сённяшняй Беларусі.
Цяпер чытаюць
«Я не святая, але ў мяне не было надзейнага пляча побач»: маці Ксюшы з СМА могуць пазбавіць бацькоўскіх правоў, яна ж даводзіць, што здольная выправіцца8
«Я не святая, але ў мяне не было надзейнага пляча побач»: маці Ксюшы з СМА могуць пазбавіць бацькоўскіх правоў, яна ж даводзіць, што здольная выправіцца
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара2222
Каментары