2 траўня айцу Альбэрту Масальскаму споўнілася б 76 гадоў.
Альбэрт Масальскі нарадзіўся 2 траўня 1932 г. у Менску. Быў ахрышчаны ў Кальварыйскім касьцёле.
Сьвятарскія пасьвячэньні атрымаў у 1966 г. ад польскага кардынала Стэфана Вышынскага, які суправадзіў высьвячэньне наступнымі словамі:
«Дзіця, табе сёньня не іграюць арганы, табе не сьпяваюць «Te Deum», табе ніхто не дае кветак. Трэба нейкі час маўчаць і не гаварыць казаньняў. Але Пан Бог усё бачыць. Згаджайся з воляй Божай і будзеш вялікім».
Па высьвячэньні а. Альбэрт Масальскі доўгі час служыў тайна. Афіцыйна працаваў на адным зь менскіх заводаў у плянавым аддзеле. Але пасьля таго як на мытні, пасьля чарговага вяртаньня з Польшчы, у яго знайшлі духоўную літаратуру і ружанцы, быў звольнены.
Масальскага перасьледавалі ўсюды, куды б ні ўладкаваўся. Больш за ўсё пратрымаўся кіяскёрам «Саюздруку». Спачатку працаваў у кіёску каля Чэрвенскага рынку, пазней — каля Камароўкі. У выхадныя дні за пэўную плату прасіў знаёмую цётку Сару папрацаваць за яго, а сам ехаў то ў Вільню, то ў вёску Краснае, што каля Маладзечна, то ў Солы Смаргонскага раёна адпраўляць у касцёле святую Імшу. Употай хрысціў, спавядаў, даваў шлюб, намашчаў хворых. Спавядацца да яго прыходзілі нават у газетны кіёск. Было і такое, што служыў святую Імшу ў рэнтгенкабінеце 2-й мінскай бальніцы: Разалія Струнеўская, якая там працавала, прыводзіла ў кабінет католікаў, што ляжалі ў гэтай бальніцы, і запрашала кс. Альберта, паведамляе Ave Maria
З 1981 г – афіцыйна пробашч касьцёлу ў Солах. З 1991 г. – пробашч касьцёлу Узвышэньня Сьвятога Крыжа на Кальварыйскіх могілках у Менску.
Памінальная служба пройдзе ў суботу, 3 траўня, у Кальварыйскім касьцёле. Пачатак а 10:30.
Каментары