Як напісаў у прадмове да кнігі гісторык Алесь Краўцэвіч, «Магдэбурская Гародня» стала ўнікальнаю для Беларусі кнігаю. У ёй зьмешчана поўнае апісаньне разьвіцьця гораду як матэрыяльнага аб’екту з улікам амаль кожнага кавалка зямлі.
Сьвет пабачыла першая кніга з сэрыі «Гарадзенская бібліятэка». 21 траўня адбудзецца прэзэнтацыя манаграфіі «Магдэбурская Гародня» гісторыка Юрыя Гардзеева.
Манаграфія расказвае пра сацыяльную тапаграфію й маёмасныя адносіны ў XVІ‑XVІІІ стагодзьдзях у Горадні. Кажа Юры Гардзееў:
Я пісаў кнігу па канонах лягічнай соцыятыпаграфіі. На пачатку я апісваю пляніроўку, потым апісваю, як горад забудоўваўся. Я апісваю, як выглядалі будынкі грамадзкага прызначэньня, напрыклад, карчма, шыбеніца, ратуша, лазьня. Апісваю таксама маёмасныя адносіны — хто, ад каго й што набываў. Абавязкова ўзгадваю пра сацыяльную дыфэрэнцыяцыю — пра бедных і заможных, прасоўваньне па лесьвіцы ерархіі ў мяшчанстве. Акрамя таго, гаворка ідзе пра рамяство й купецтва. Гэта такая традыцыйная эўрапейская схема тыпаграфіі.
Як напісаў у прадмове да кнігі гісторык Алесь Краўцэвіч, «Магдэбурская Гародня» стала ўнікальнаю для Беларусі кнігаю. У ёй зьмешчана поўнае апісаньне разьвіцьця гораду як матэрыяльнага аб’екту з улікам амаль кожнага кавалка зямлі.
Манаграфія Юрыя Гардзеева стала першай кнігай у сэрыі «Гарадзенская бібліятэка». У найбліжэйшым часе плянуецца выданьне чарговых кніжак. Кажа каардынатар сэрыі Павал Мажэйка:
Першая частка «Гарадзенскай бібліятэкі» гэта чатыры пазыцыі. Першая ўжо выйшла, гэта «Магдэбурская Гародня».
Другая будзе першаю спробаю прозы (эсэ, успаміны) гарадзенскай паэткі Дануты Бічэль. Яна ўзгадвае пра дзяцінства, пра культуру, зь якой яна сутыкалася, пра сустрэчы зь вядомымі беларусамі (Быкавым, Карпюком).
Таксама мы выдамо кнігу Аляксея Карпюка, напісаную на пачатку 90‑х гадоў, але раскіданую па часопісах. Мы яе сабралі й паспрабуем выдаць.
Чацьвёртай будзе сэрыя «Постаці Гарадзеншчыны». У ёй мы паспрабуем раскрыць тэму беларускага нацыянальнага руху на Гарадзеншчыне. Гэта 20‑30‑я гады, калі тут была Рэч Паспалітая. Таму гэта будзе тэма адносінаў паміж палякамі й беларусамі на Гарадзеншчыне. Яна вельмі контравэрсійная, але мы вырашылі ёю заняцца.
Павал Мажэйка дадаў, што выданьнем згаданых чатырох кніг «Гарадзенская бібліятэка» ня скончыцца. Ужо ёсьць выдавецкія пляны на будучы год.
Каментары