Аднаразовыя пластыкавыя пакеты, якія, напрыклад, часта выдаюць на касах супермаркетаў, забароняць у Францыі з 1 ліпеня гэтага года. Гэтая мера тычыцца не толькі харчовых крам, але таксама аптэк, булачных, рынкаў і іншых гандлёвых кропак.
Платныя ці бясплатныя поліэтыленавыя пакеты таўшчынёй менш за 50 мкм будуць забароненыя ў Францыі.
Пакупнікі змогуць выбраць паміж шматразовымі пластыкавымі пакетамі таўшчынёй больш за 50 мкм, пакетамі з паперы, ці з пэўным зместам матэрыялаў расліннага паходжання (напрыклад, бульбянога і кукурузнага крухмалу). Ці, напрыклад, карыстацца торбамі з тканіны.
Многія французскія крамы адмовіліся ад аднаразовых пластыкавых пакетаў яшчэ да ўступлення ў сілу дэкрэта. Ці ж рабілі пластыкавыя пакеты платнымі, каб заахвочваць людзей выкарыстоўваць шматразовыя сумкі.
Праз паўгода, у студзеня 2017-га, пад забарону трапяць і пластыкавыя пакеты ў розных аддзелах супермаркетаў.
Аднаразовыя пластыкавыя пакеты, якія выкарыстоўваюцца часцей за ўсё, каб прынесці набытае дадому, раскладаюцца на працягу 100-400 гадоў.
Па дадзеных міністэрства экалогіі, штогод у Францыі выкарыстоўваецца каля 17 мільярдаў аднаразовых пакетаў. 75% адходаў, што забруджваюць моры і акіяны, — з пластыка, нагадвае ведамства.
Каментары