Прэзідэнцкія дэбаты ў ЗША арганізоўваў сын эмігрантаў з Беларусі
Глыбокай ноччу, паводле менскага часу, Амэрыка застыла перад тэлевізарамі. У Нью-Ёрку прайшлі першыя прэзыдэнцкія тэледэбаты паміж Гілары Клінтан і Дональдам Трампам. «Найважнейшыя 90 хвілін для амэрыканскай палітычнай гісторыі», — так гэтую сустрэчу назвалі амэрыканскія камэнтатары.
Уявіце сабе, што ў гэтай гісторыі ёсьць беларускі акцэнт. Галоўным выканаўчым прадусарам амэрыканскіх прэзыдэнцкіх тэледэбатаў з 2000 году зьяўляецца сын ураджэнцаў Беларусі — Марцін Слуцкі. Яго пасада — ня нейкая тэхнічная функцыя. Слуцкі выконвае сваю працу на падставе рашэньня Камісіі па прэзыдэнцкіх выбарах у ЗША. Ён займаецца арганізацыйнымі пытаньнямі, прыдумляе фармат, працуе з мадэратарамі, кандыдатамі ў прэзыдэнты і пасярэднічае паміж іх штабамі. Гэта голас Марціна Слуцкага сёньня чуў у слухаўцы вядучы тэледэбатаў Лэстэр Голт.
З Марцінам Слуцкім я меў гонар пазнаёміцца летась у Вільні. Ён прыляцеў напярэдадні беларускіх прэзыдэнцкіх дэбатаў на Белсаце, каб правесьці журналісцкі трэнінг для вядучых: мяне і майго калегі Паўла Мажэйкі. Слуцкі, які на «ты» з усімі амэрыканскімі прэзыдэнтамі, вельмі сьціплы і просты ў кантактах чалавек. Але найважнейшае — першаклясны прафэсіянал. Распавёўшы нам пра свае палітычныя погляды, ён ня раз зьвяртаў увагу, што ніколі ў жыцьці не дазволіў сабе праявіць гэта падчас працы. У працы вядучага тэледэбатаў, вучыў ён нас, павінна быць максымальная нэўтральнасьць, добрая падрыхтоўка па тэме, расплянаваная кожная доля сэкунды, уменьне слухаць, не самалюбавацца, а думаць кожнае імгненьне пра гледача, быць яго голасам, быць яго мозгам. Нельга дазволіць сябе справакаваць, абразіцца, паказаць эмоцыі. «Poker face» — такімі павінны быць паводзіны вядучага, незалежна ад таго, працуе ён у ЗША, Бурундзі ці Беларусі.
Сам сябе Марцін Слуцкі называе беларускім габрэем. Яго бацька — са Слуцку, а маці — з Клецку. У Амэрыку яны трапілі ў 1910-ых гадах малымі дзецьмі. У маладосьці Марцін Слуцкі быў рокерам. Граў на гітары ў гурце McKendree Spring, які выпусьціў 9 дыскаў. Аднойчы малодшы Буш прызнаўся Марціну, што ў юнацтве танчыў пад ягоную музыку.
Апошнія 35 гадоў Слуцкі зьвязаны з тэлевізіяй. За сваю працу ён атрымаў 7 узнагарод Emmy Award, тэлевізійны аналяг «Оскара». Сёньня сын беларускіх габрэяў са Слуцку і Клецку трымаў руку ну пульце адной з самых рэйтынгавых у Амэрыцы тэлеперадач. Прадказвалася, што дэбаты ў жывым эфіры паб'юць рэкорд глядацкай папулярнасьці Чэмпіянату амэрыканскага футболу Superbowl. Дарэчы, Слуцкі быў прадусарам і гэтага спартыўнага шоў.
Каментары