Prezidenckija debaty ŭ ZŠA arhanizoŭvaŭ syn emihrantaŭ ź Biełarusi
Hłybokaj nočču, pavodle mienskaha času, Ameryka zastyła pierad televizarami. U Ńju-Jorku prajšli pieršyja prezydenckija teledebaty pamiž Hiłary Klintan i Donaldam Trampam. «Najvažniejšyja 90 chvilin dla amerykanskaj palityčnaj historyi», — tak hetuju sustreču nazvali amerykanskija kamentatary.
Ujavicie sabie, što ŭ hetaj historyi jość biełaruski akcent. Hałoŭnym vykanaŭčym pradusaram amerykanskich prezydenckich teledebataŭ z 2000 hodu źjaŭlajecca syn uradžencaŭ Biełarusi — Marcin Słucki. Jaho pasada — nia niejkaja techničnaja funkcyja. Słucki vykonvaje svaju pracu na padstavie rašeńnia Kamisii pa prezydenckich vybarach u ZŠA. Jon zajmajecca arhanizacyjnymi pytańniami, prydumlaje farmat, pracuje z maderatarami, kandydatami ŭ prezydenty i pasiaredničaje pamiž ich štabami. Heta hołas Marcina Słuckaha siońnia čuŭ u słuchaŭcy viadučy teledebataŭ Łester Hołt.
Z Marcinam Słuckim ja mieŭ honar paznajomicca letaś u Vilni. Jon prylacieŭ napiaredadni biełaruskich prezydenckich debataŭ na Biełsacie, kab pravieści žurnaliscki treninh dla viadučych: mianie i majho kalehi Paŭła Mažejki. Słucki, jaki na «ty» z usimi amerykanskimi prezydentami, vielmi ścipły i prosty ŭ kantaktach čałaviek. Ale najvažniejšaje — pieršaklasny prafesijanał. Raspavioŭšy nam pra svaje palityčnyja pohlady, jon nia raz źviartaŭ uvahu, što nikoli ŭ žyćci nie dazvoliŭ sabie prajavić heta padčas pracy. U pracy viadučaha teledebataŭ, vučyŭ jon nas, pavinna być maksymalnaja neŭtralnaść, dobraja padrychtoŭka pa temie, rasplanavanaja kožnaja dola sekundy, umieńnie słuchać, nie samalubavacca, a dumać kožnaje imhnieńnie pra hledača, być jaho hołasam, być jaho mozham. Nielha dazvolić siabie spravakavać, abrazicca, pakazać emocyi. «Poker face» — takimi pavinny być pavodziny viadučaha, niezaležna ad taho, pracuje jon u ZŠA, Burundzi ci Biełarusi.
Sam siabie Marcin Słucki nazyvaje biełaruskim habrejem. Jaho baćka — sa Słucku, a maci — z Klecku. U Ameryku jany trapili ŭ 1910-ych hadach małymi dziećmi. U maładości Marcin Słucki byŭ rokieram. Hraŭ na hitary ŭ hurcie McKendree Spring, jaki vypuściŭ 9 dyskaŭ. Adnojčy małodšy Buš pryznaŭsia Marcinu, što ŭ junactvie tančyŭ pad jahonuju muzyku.
Apošnija 35 hadoŭ Słucki źviazany z televizijaj. Za svaju pracu jon atrymaŭ 7 uznaharod Emmy Award, televizijny analah «Oskara». Siońnia syn biełaruskich habrejaŭ sa Słucku i Klecku trymaŭ ruku nu pulcie adnoj z samych rejtynhavych u Amerycy telepieradač. Pradkazvałasia, što debaty ŭ žyvym efiry pabjuć rekord hladackaj papularnaści Čempijanatu amerykanskaha futbołu Superbowl. Darečy, Słucki byŭ pradusaram i hetaha spartyŭnaha šoŭ.
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary