Ярмошына на пахаванні былога сакратара Цэнтрвыбаркама Мікалая Лазавіка: Ён быў душой камісіі
Былы сакратар Цэнтральнай камісіі па выбарах і правядзенні рэспубліканскіх рэферэндумаў Беларусі Мікалай Лазавік пахаваны 7 лістапада на Паўночных могілках пад Мінскам, паведамляе БелаПАН са спасылкай на СТВ.
«Душой камісіі» назвала Лазавіка на цырымоніі развітання старшыня Цэнтрвыбаркама Лідзія Ярмошына.
«Мікалай Іванавіч быў чалавекам вельмі адкрытым. І для сродкаў масавай інфармацыі ён быў скарбніцай інфармацыі з першых вуснаў, інфармацыі сумленнай, інфармацыі, якая заўсёды была патрэбна журналістам», — сказала ў інтэрв'ю СТВ міністр інфармацыі Лілія Ананіч.
«Ён быў выдатным чалавекам. Да таго ж вельмі высокім прафесіяналам, заўсёды быў душой выбарчай камісіі. Ні адна сур'ёзная праца, ні адна выбарчая кампанія, пакуль ён быў жывы і ўваходзіў у Цэнтральную камісію, не праходзіла без яго актыўнага ўдзелу», — адзначыў намеснік кіраўніка Адміністрацыі прэзідэнта Валерый Міцкевіч.
Мікалай Лазавік памёр 5 лістапада пасля цяжкай хваробы на 66-м годзе жыцця. Ад пасады сакратара Цэнтрвыбаркама ён быў вызвалены 17 кастрычніка ўказам прэзідэнта.
Лазавік займаў пасаду сакратара ЦВК ад 2000 года. Ад 2006 года па 2015-ы знаходзіўся ў спісе асобаў, якім быў забаронены ўезд у ЕС у межах санкцый.
Лазавік нарадзіўся ў 1951 годзе ў вёсцы Невіняны Вілейскага раёна Мінскай вобласці. У 1972 годзе скончыў Беларускі інстытут механізацыі сельскай гаспадаркі, у 1993-м — Беларускі дзяржаўны ўніверсітэт, у 2000-м — Акадэмію кіравання пры прэзідэнце, у 2003 годзе — аспірантуру пры Акадэміі кіравання. Кандыдат эканамічных навук.
Быў дэпутатам Вярхоўнага Савета Беларусі 13-га склікання, уваходзіў у камісію па дзяржаўным будаўніцтве і мясцовым самакіраванні. У 1996 годзе паставіў подпіс за імпічмент Аляксандра Лукашэнкі, але потым адклікаў свой подпіс і пасля канстытуцыйнага рэферэндуму аб пашырэнні паўнамоцтваў прэзідэнта перайшоў у Палату прадстаўнікоў першага склікання.
Цяпер чытаюць
Вось хто той хлопец, які паехаў на праполку бульбы і стаў героем сацсетак7
Каментары