У дзявятую суботу шматтысячных пратэстаў у Сеуле з патрабаваннем адстаўкі паўднёвакарэйскага прэзідэнта Пак Кын Хе маніфестанты масава апрануліся ў касцюмы Санта-Клаўса.
Па словах арганізатараў дэманстрацыі, на яе сабралася больш за 550 тысяч карэйцаў. Пратэстоўцы спявалі: «Арыштуйце Пак неадкладна».
Некалькі сотняў маладых людзей раздавалі дзецям падарункі і паштоўкі, перыядычна скандуючы: «Дзецям — падарункі, Пак — кайданкі».
У пачатку снежня пасля працяглых пратэстаў на фоне скандалу парламент пачаў працэдуру імпічменту Пак Кын Хе.
У адпаведнасці з канстытуцыяй, пракуратура не можа прад'явіць крымінальныя абвінавачванні дзейнаму кіраўніку дзяржавы, бо ён валодае недатыкальнасцю. У Вярхоўнага суда краіны засталося 170 дзён на тое, каб вынесці рашэнне аб імпічменце прэзідэнта.
Скандал пачаўся, калі ў рукі журналістаў патрапіў шэраг сакрэтных дакументаў, уключаючы чарнавікі 44 прамоваў прэзідэнта, з праўкамі, унесенымі яе памочніцай. Гэта спарадзіла чуткі пра тое, што Чхве Сун Силь, сяброўка юнацтва і памочніца Пак Кын Хе, карыстаецца сваім уплывам на кіраўніка дзяржавы, каб здабываць выгаду і ўплываць на дзяржаўную палітыку.
Пазней Чхве Сун Сіль прад'явілі абвінавачванні ў карупцыі. Па версіі пракуратуры, яна прымушала буйны бізнес уносіць ахвяраванні ў свае фонды. Следства мяркуе, што прэзідэнт ведала пра тое, што адбываецца, адвакаты Пак Кын Хе гэта адмаўляюць.
Рэйтынг прэзідэнта пачаў хутка падаць. Пак Кын Хе двойчы выбачылася, а ў канцы лістапада выказала гатоўнасць сысці ў адстаўку. Яна правяла сур'ёзныя кадравыя перастаноўкі, змяніўшы прэм'ера, міністра фінансаў, кіраўніка сваёй адміністрацыі і палітычнага сакратара.
Падпалкоўніка з факультэта вайсковай разведкі судзяць за «здраду дзяржаве» па справе, якая выглядае палітычнай. Што пра яго вядома?6
Каментары