Ці 25 сакавіка ў Беларусі будзе заблакаваны доступ да сацыяльных сетак і інтэрнэт-старонак?
Тэхнічная магчымасць для такога ва ўладаў ёсць. Ці прынятае такое рашэнне, вядома толькі вузкаму колу людзей, прысутнаму на нарадзе ў Аляксандра Лукашэнкі 23 сакавіка.
Нагадаем, што лідары пратэстаў, у тым ліку Мікалай Статкевіч, заклікалі на Дзень Волі правесці ў Мінску дэманстрацыю супраць эканамічнай палітыкі ўладаў. Адміністрацыя горада шэсце не дазволіла, але масавы збор народу ўсё адно чакаецца.
Блакаванне асобных сайтаў ці нават гмэйла і фэйсбука ўжо здаралася ў мінулыя гады падчас вялікіх дэманстрацый пратэсту. Такое ў той ці іншай форме адбывалася ў 2001, 2004, 2006, 2010 і 2014 гадах.
Спосабы блакавання сайтаў былі рознымі, ад ддос-атак да адключэння адраса размешчанага ў Беларусі сайта. Неаднолькавым быў і поспех гэтых мерапрыемстваў. Здаецца, улады баяліся, каб пратэстоўцы не каардынавалі сваіх дзеянняў праз інтэрнэт, а таксама імкнуліся абмежаваць распаўсюд фота і відэа з Мінска, якія абвяргаюць стэрэатыпы аб усеагульнай падтрымцы Аляксандра Лукашэнкі.
Праўда, у тыя гады інтэрнэт не адыгрываў такой важнай ролі ў жыцці людзей. Перакрыццё сеціва сёння было б заўважанае нашмат большай колькасцю людзей і нанесла б большую эканамічную шкоду прадпрыемствам краіны.
У той жа час блочыць асобныя навінныя рэсурсы не мае вялікага сэнсу ва ўмовах існавання сацыяльных сетак, бо інфармацыя праз іх разыходзіцца імгненна, у тым ліку і жывыя відэастрымы.
Важна не паддавацца істэрыі: доступ да інтэрнэту ці заблочаных сайтаў заўсёды вяртаецца неўзабаве пасля сканчэння дэманстрацыі.
Каментары