На сайце «Гродзенскай праўды» на здымку зафоташопілі ікону Хрыста ФОТАФАКТ
Савецкага саюза даўно няма і царква жыве свабодна, але ў Гродне адбылася «містычная» сітуацыя ў духу самых цёмных гадоў «ваяўнічага атэізму». З фатаграфіі на сайце абласной газеты «Гродзенская праўда» знікла ікона Хрыста, пры гэтым на іншых фота ў гэтым жа матэрыяле ікону відаць. Хтосьці добра папрацаваў у фоташопе, вось толькі для чаго?
Фота зроблена 6 траўня падчас пасадкі алеі «Сирень Победы» недалёка ад Каложскай царквы. У акцыі ўдзельнічалі старшыня гарвыканкама Мечыслаў Гой, ветэраны, школьнікі і прадстаўнікі царквы.
Усё праходзіла побач з парафіяльным цэнтрам, дзе над уваходам пастаянна вісіць ікона Хрыста. Удзельнікі фатаграфаваліся на фоне будынка, і ў матэрыялах Hrodna.life і «Гродзенскай праўды» ікону добра відаць. Акрамя адной, загалоўнай фатаграфіі «ГП». На ёй ікона знікла, і гэта выклікала абурэнне ў вернікаў, прадстаўнікоў царквы і савета ветэранаў.
«Мы, удзельнікі ўрачыстага мітынгу ў Каложскім парку, былі вельмі абураныя, здзіўлены і заклапочаныя тым, што на фота, апублікаваным на сайце газеты «Гродзенская Праўда» ад 06.05.2017 года, адсутнічае ікона Хрыста. Падобныя скажэнні рэчаіснасці падрываюць аўтарытэт СМІ», — напісаў у газету старшыня ветэранскай арганізацыі пры ЖЭС-5 Пісараў В.А.
«Адышлі ў нябыт гады, калі гэта практыкавалася. Сучасная праваслаўная царква актыўна ўдзельнічае ў грамадскім жыцці краіны, клапоціцца аб патрыятычным выхаванні моладзі, прывiваючы людзям любоў і павагу адзін да аднаго, нясе словы Праўды.
Хацелася б ведаць, ад каго зыходзіла ініцыятыва замаляваць на фота ікону і ў імя чаго?» — пытаецца ветэран.
Настаяцель Каложскай царквы Аляксандр Балоннікаў таксама здзіўлены: чаму такое адбылося, бо ён, як і ўсе, удзельнічаў у пасадцы алеі і нічога перадузятага не назіраў.
«Калі мне пра гэта сказалі людзі, якія чытаюць «Гродзенскую праўду», я быў здзіўлены. Хочацца верыць, што гэта непаразуменне. І калі гэта сапраўды так, то мы спадзяёмся, што рэдакцыя «ГП» выправіць гэтую тэхнічную недакладнасць».
Навіну з фотаздымкамі перадрукавалі некалькі раённых газет і сайт Гродзенскага гарвыканкама. Так па сетцы распаўсюдзілася «Гродзенская няпраўда».
Пасля шматлікіх скаргаў у рэдакцыю газеты галоўную фатаграфію памянялі. Цяпер на ёй прысутнічае ікона. Але на сайтах, што зрабілі перадрукі, фатаграфія застаецца старой.
Каментары