Ад блізкай да Зямлі зоркі атрыманыя дзіўныя радыёсігналы. У нядзелю за імі будуць назіраць шмат навукоўцаў
Астраномы Універсітэта Пуэрта-Рыка ў Арэсіба сцвярджаюць, што атрымалі вельмі дзіўныя сігналы ад зоркі Ross 128, размешчанай адносна недалёка ад Зямлі (11 светлавых гадоў), паведамляе Space.com.
На працягу красавіка і траўня 2017 года навукоўцы даследавалі некалькі невялікіх чырвоных карлікаў (вакол некаторых з гэтых зорак былі выяўленыя планеты). Хоць у Ross 128 аб такіх планетах не было вядома, астраномы зафіксавалі дзіўныя сігналы ў запісе дынамікі спектру на інтэрвале дзесяць хвілін. Сігналы былі прынятыя 13 траўня і ўяўлялі сабой квазіперыядычныя непалярызаваныя пульсацыі, з падобнымі да дысперсіі ўласцівасцямі.
На думку астраномаў, гэта не могуць быць радыёчастотныя перашкоды мясцовага характару: такія сігналы давала толькі Ross 128, ад суседніх зорак не зыходзіць нічога падобнага. Пакуль навукоўцы разглядаюць тры версіі паходжання гэтых сігналаў: яны могуць тлумачыцца выкідамі, аналагічнымі выбухам на Сонцы, выпраменьваннямі нейкага аб'екта, які патрапіў у поле агляду Ross 128 або «следам» высокаарбітальнага спадарожніка.
Паколькі сігналы занадта слабыя для таго, каб іх маглі злавіць іншыя радыётэлескопы, астраномы Абсерваторыі Арэсіба дамовіліся з калегамі з праекту SETI аб выкарыстанні Антэнавай Рашоткі Алена і тэлескопа Грын-Бэнк для прыцэльнага назірання за Ross 128 у гэтую нядзелю.
Каментары