У Yahoo скралі 3 мільярды пароляў — гэта найбуйнейшы выпадак крадзяжу ў гісторыі
Амерыканская інтэрнэт-кампанія Yahoo заявіла, што ў яе былі скрадзеныя не толькі асабістыя звесткі 500 мільёнаў карыстальнікаў у 2014 годзе, і не толькі звесткі 1 мільярда ў 2013-м, як паведамлялася раней, а звесткі ўсіх 3 мільярдаў карыстальнікаў, паведамляе Радыё Свабода.
Новыя ацэнкі атакі 2013 году ўтрая перавышаюць ранейшыя. З кастрычніка кампанія пачала рассылку электронных лістоў з паведамленьнем пра «дадатковых» ахвяраў атакі.
Кампанія сьцьвярджае, што скрадзеныя зьвесткі ня ўтрымлівалі незашыфраваныя паролі, зьвесткі пра банкаўскія карткі ці рахункі. Скрадзеныя зьвесткі могуць уключаць імёны, адрасы электроннай пошты, нумары тэлефонаў, даты нараджэньня, зашыфраваныя паролі, а таксама ў асобных выпадках незашыфраваныя адказы на сакрэтныя пытаньні. Некаторыя скрадзеныя зьвесткі могуць даць хакерам завалодаць акаўнтам бязь веданьня паролю.
Гэта найбуйнейшы вядомы выпадак крадзяжу асабістых звестак у гісторыі чалавецтва — таксама як найбуйнейшымі лічыліся ранейшыя здарэнні з Yahoo.
Як адбываліся ўзломы, кампанія па-ранейшаму не распавядае падрабязна, але заяўляе, што падазрае «хакераў, спансаваных дзяржавай».
Усяго Yahoo мае каля 1 млрд карыстальнікаў, актыўных штомесяц, і 225 млн актыўных карыстальнікаў яе паштовага сэрвісу. Гэта значыць, былі скрадзеныя звесткі і шматлікіх неактыўных, ранейшых карыстальнікаў сэрвісаў кампаніі.
Сёлета ў чэрвені мабільны аператар Verizon завяршыў угоду аб паглынанні Yahoo за 4,8 млрд даляраў.
Цяпер чытаюць
Ці варта купляць закінутую хату за адну базавую і колькі гэта каштуе насамрэч? Вось што расказваюць людзі1
Каментары