Адхілены ад пасады ўладамі Іспаніі кіраўнік урада Каталоніі Карлес Пучдэмон і пяць яго міністраў у панядзелак з'ехалі ў Бельгію. Інфармацыю аб прыездзе кіраўніка аўтаноміі ў Брусэль пацвердзіў наняты ім бельгійскі адвакат Поль Бекар, паведамляюць бельгійскія СМІ
Адвакат адмовіўся сказаць, ці папрасіў Пучдэмон палітычнага прытулку ў Бельгіі. Паводле яго слоў, кіраўнік Каталоніі наняў яго для магчымай юрыдычнай абароны.
«Калі яму спатрэбіцца юрыдычная абарона, я буду прадстаўляць яго, — сказаў адвакат. — Пытанне прытулку застаецца адкрытым».
Le Soir галоўнай навіной раніцы так і ставіць пытанне: «Пучдэмон будзе прасіць прытулку? Яшчэ нічога не вырашана, кажа яго адвакат».
Іспанская прэса закідае адвакату, што ён больш за 30 гадоў займаўся абаронай членаў басконскай сепаратысцкай групоўкі ЭТА, якія апынуліся ў Бельгіі. Урад Іспаніі патрабаваў іх экстрадыцыі.
«Мабыць, у сувязі з гэтым маім вопытам, ён [Пучдэмон] звярнуўся да мяне па дапамогу», — сказаў Бекар.
Прэса Іспаніі паведамляе, што Пучдэмон мае намер сустрэцца ў Брусэлі з прадстаўнікамі партыі фламандскіх нацыяналістаў «Новы фламандскі альянс» (NVA), якая ўваходзіць у кіруючую ў Бельгіі ўрадавую кааліцыю, аднак у партыі гэтую інфармацыю не пацвердзілі.
Паводле інфармацыі іспанскага агенцтва EFE, Пучдэмон і пяцёра міністраў каталонскага ўрада пакінулі аўтаномію на аўтамабілі, даехаўшы да Марсэля на паўднёвым усходзе Францыі (шлях з Барселоны ў Марсэль займае прыкладна пяць гадзін), а адтуль самалётам адправіліся ў Бельгію.
Разам з Пучдэмонам у Бельгію адправіліся міністр кіравання і інстытуцыйных адносін Каталоніі Мерытчэль Барас, міністр па пытаннях аховы здароўя Антоні Комін, міністр унутраных спраў каталонскага ўрада Жаакім Форна, міністр працы, сацыяльных пытанняў і сям'і Далорэс Баса, а таксама міністр па сельскай гаспадарцы Мерытчэль Сержт.
У панядзелак генпракурор Іспаніі Хазэ Мануэль Маса заклікаў выставіць супраць былых кіраўнікоў Каталоніі абвінавачванні ў арганізацыі бунту і незаконнага выкарыстання дзяржаўнага бюджэту.
Калі Карлес Пучдэмон будзе прызнаны вінаватым у арганізацыі бунту, яму пагражае 30-гадовы турэмны тэрмін. Паводле законаў Іспаніі, заяўка пракурора павінна быць спачатку разгледжана суддзёй.
***
На тэлеграм-канал «Нашай Нівы» можна падпісацца тут.
Цяпер чытаюць
Беларуска распачала чэлендж «40 спатканняў», але ўжо на сярэдзіне не хавае расчаравання ў мужчынах48
Каментары