Беларускі ПЭН-цэнтр і Саюз беларускіх пісьменнікаў пры падтрымцы Польскага Інстытута ў Мінску распачынаюць чарговы сезон Прэміі імя Ежы Гейдройца, паведамляюць арганізатары.
У гэтым годзе аргкамітэт Прэміі ідзе на пэўны эксперымент, каб наблізіць выбар пераможцаў да ідэалу аб’ектыўнасці: упершыню журы будзе складацца пераважна з літаратуразнаўцаў і крытыкаў. Таксама плануецца запусціць механізм уліку чытацкага меркавання адносна вылучаных кніг, адзначаецца ў прэс-рэлізе.
Прэтэндаваць на ўдзел могуць кнігі, напісаныя на беларускай мове, у жанрах мастацкай і дакументальнай прозы, выдадзеныя ў папяровым альбо электронным варыянце паміж 1 студзеня і 31 снежня 2017 года. Прыём заявак будзе завершаны 31 мая.
Для лаўрэатаў прэміі прадугледжваецца наступнае грашова-каштоўнаснае заахвочванне:
— першае месца: чэк на суму, эквівалентную 5000 еўра, за выняткам усіх неабходных падаткаў;
другое месца: творчая стыпендыя ў Доме творчасці пісьменнікаў у Вісбю (Швецыя),
— трэцяе месца: друк кнігі ў выдавецтве «Кнігазбор» у серыі «Кнігарня пісьменніка».
Пазней будзе названы лонг-ліст з 12 кніг і шорт-ліст з 6 кніг.
***
Прэмія імя Ежы Гедройца ўручаецца з 2012 года. На прэмію могуць намінавацца кнігі, выдадзеныя ў папяровым або электронным варыянтах цягам каляндарнага года на беларускай мове ў жанрах «мастацкая проза», «эсэістыка».
Папярэднія пераможцы прэміі: Павал Касцюкевіч з кнігай «Зборная РБ па негалоўных відах спорту» (2012), Уладзімір Някляеў з кнігай «Аўтамат з газіроўкай з сіропам і без» (2013), Ігар Бабкоў — «Хвілінка: Тры гісторыі» (2014), Віктар Казько — «Час збіраць косці» (2015), Макс Шчур — «Завяршыць гештальт» (2016), Зміцер Бартосік з кнігай «Быў у пана верабейка гаварушчы» (2017)
Каментары