Прэзентацыя адбудзецца ў Нацыянальным гістарычным музеі (Маркса, 12). Пачатак а 17.30.
Ад 17.30 да 19.00 вы зможаце набыць свежы нумар «Нашай гісторыі» па цане ад выдаўцоў і прыдбаць толькі што надрукаваны фірмовы каляндар. Вы зможаце задаць пытанні, прапанаваць тэмы для новых артыкулаў. Аўтару найлепшай прапановы — каляндар у падарунак!
На прэзентацыі выступяць галоўны рэдактар Андрэй Дынько і аўтары нумару.
Літаратуразнаўца і пісьменніца Ганна Севярынец, аўтарка артыкула пра тое, як каханка Маякоўскага Зося Шамардзіна стала першай лэдзі БССР, раскажа пра Менск 1920—х: багемны, вясёлы, суровы і жарсны.
Якія хітрыкі дазволілі прыняць Статут ВКЛ 1588 — таямніцу адкрые кандыдат гістарычных навук Уладзімір Падалінскі.
Пра традыцыі беларускага салюту і магнацкія феерверкі ў гонар цешчы распавядзе кандыдат гістарычных навук, спецыяліст па артылерыі Мікола Волкаў.
Пра Рыгора Дольнікава - героя Савецкага Саюза, які пасля першай не закусваў, гарачага хлопца з-пад Магілёва і прататыпа для шолахаўскай «Судьбы человека» - раскажа Аляксей Бацюкоў.
Асаблівую атмасферу на прэзентацыі створыць гурт «Рада» з аўтэнтычнымі гістарычнымі песнямі беларусаў.
* * *
«Наша гісторыя» — першы глянцавы часопіс пра беларускую і сусветную гісторыю. Агульны наклад першых чатырох нумароў перавысіў 30 000 асобнікаў. Часопіс змяшчае папулярныя артыкулы ад найлепшых навукоўцаў, а таксама гістарычныя коміксы, звяртае ўвагу на нечаканыя тэмы і новыя ракурсы знаёмых падзей, унікальныя ілюстрацыі і новыя фарматы.
Каментары