Арцыбіскуп Тадэвуш Кандрусевіч блаславіў званы, якія цяпер будуць склікаць на малітву ў Чырвоны касцёл у Мінску ФОТЫ
На вежы Чырвонага касцёла ў Мінску 17 лютага мітрапаліт Мінска-Магілёўскі, арцыбіскуп Тадэвуш Кандрусевіч блаславіў тры новыя званы, якія з гэтага часу будуць рэгулярна склікаць вернікаў на малітву ў Чырвоны касцёл у Мінску паведамляе catholic.by.
Тры званы — звон Алімпіі, Сымона і Алены, звон Слугі Божага Эдварда Вайніловіча і звон Міхала Арханёла — былі адлітыя польскай фірмай Rduch, удакладняе krynica.info.
Як адзначыў арцыбіскуп, званы — гэта не толькі прыгожы музычны інструмент, але, перш за ўсё знак евангелізацыі, які абуджае чалавечае сумленне, заклікае да малітвы.
У савецкія часы гістарычныя званы былі знятыя з Чырвонага касцёла, адзначыў ён. Падзея благаслаўлення новых званоў у Чырвоным касцёле, дадаў арцыбіскуп, стала магчымай дзякуючы старанням пробашча кс. каноніка Уладзіслава Завальнюка, кс. прэлата Андрэя Стэцкевіча, ахвярнасці гэтай парафіі і спонсараў.
Пробашч парафіі св. Сымона і св. Алены кс. канонік Уладзіслаў Завальнюк шчыра падзякаваў усім ахвярадаўцам, за чые сродкі ў Польшчы фірмай Яна Фэльчынскага, якая спецыялізуецца на касцёльных званах, былі адлітыя тры званы для Чырвонага касцёла.
Пры гэтым пробашч асабліва падкрэсліў, што грошы на званы ахвяравалі не толькі католікі, але і праваслаўныя: «Перазвон званоў — супольная традыцыя ў Касцёле і ў Царкве. Званы асвячаюць і яднаюць католікаў і праваслаўных»,— пранікнёна сцвердзіў святар.
Пасля бласлаўлення званоў арцыбіскуп Тадэвуш Кандрусевіч, стоячы на ўзвышшы перад касцёлам, урачыста інаўгураваў іх першы ўрачысты перазвон.
Цяпер чытаюць
Куды цяпер едуць вучыцца беларускія студэнты — топ краін і тэндэнцый8
Каментары