Улады Брэста пайшлі на дыялог з пратэстоўцамі супраць акумулятарнага завода і дапускаюць яго закрыццё
У нядзелю на плошчы Леніна ў Брэсце традыцыйна сабраліся пратэстоўцы. Каля 12.00 да лідараў пратэсту падышлі супрацоўнікі гарвыканкама і запрасілі ў канферэнц-залу абласнога камітэта Федэрацыі прафсаюзаў на дыялог з мясцовымі ўладамі, перадае TUT.BY.
Людзі запрашэнне прынялі. Разлічаная на 250 месцаў зала была запоўненая пад завязку. Разам з мэрам Аляксандрам Рагачуком у прэзідыуме сядзеў намеснік старшыні Брэсцкага аблвыканкама Генадзь Барысюк.
— Важна разумець, што ў працэсе будаўніцтва ў нас былі якія зыходныя? Праект, які прайшоў экалагічную экспертызу, сам інвестар, добры ці дрэнны — гэта ўжо іншая тэма, і сам факт будаўніцтва. І тут «крыць» было няма чым. Цяпер, калі завод ўступіў у стадыю пачатку вытворчасці, ёсць выразны інструментар, каб паглядзець, ці атрымалася штосьці ў гэтага інвестара, ці будзе завод працаваць наогул і, калі ёсць нейкія значныя адхіленні, дык як яго закрыць. Вось і ўсё, — адзначыў Аляксандр Рагачук пад апладысменты прысутных.
Старшыня Брэсцкага гарвыканкама таксама закрануў тэму копіі дакладной запіскі абласнога прыродаахоўнага камітэта ў аблвыканкам, якая патрапіла ў інтэрнэт, у якой гаворыцца пра перавышэнне на заводзе «вызначаных нарматываў дапушчальных выкідаў забруджвальных рэчываў у атмасфернае паветра ад нарматыўных стацыянарных крыніц выкідаў».
— Гэта афіцыйны дакумент, які пацвярджае, імаверна, памылковасць і, можа быць, недасканаласць гэтага праекта. Дакумент ніхто не прыхоўваў. У суботу Міністэрства аховы навакольнага асяроддзя пацвердзіла, што пачынаецца адміністрацыйны працэс аб прыцягненні завода да адказнасьці за тое, што не выконваецца заяўленае. Паралельна ідзе праца дзяржаўнай экалагічнай экспертызы, якая таксама не дала станоўчага заключэння. Падстаў для пуску завода няма на гэты момант, — паведаміў Аляксандр Рагачук.
Чытайце: На заводзе АКБ пад Брэстам — перавышэнне шкодных выкідаў. Распачаты адміністрацыйны працэс
Мэр прапанаваў аднаму з лідараў пратэстнага руху Дзям'яну Лепясевічу сабраць групу з 10 чалавек на сустрэчу са старшынёй аблвыканкама Анатолем Лісам па пытаннях акумулятарнага завода. Чакаецца, што бакі збяруцца ў сераду, 12 чэрвеня.
— Зараз нам трэба вырашыць пытанне канцэптуальна: завод працаваць будзе ці не будзе, — рэзюмаваў мэр.
Акрамя таго, Аляксандр Рагачук нагадаў тое, пра што раней казаў губернатар: калі будуць знойдзеныя парушэнні, то акумулятарны завод працаваць не будзе.
— Няўжо вы думаеце, што я хачу ўвайсці ў гісторыю не як мэр, які горад падрамантаваў да 1000-годдзя, а як будаўнік акумулятарнага завода? — адзначыў Аляксандр Рагачук.
Дзям'ян Лепясевіч падтрымаў прапанову мэра, але падкрэсліў, што любыя работы на заводзе неабходна неадкладна спыніць. Паводле яго слоў, людзі асцерагаюцца, што 11 чэрвеня прыёмачная камісія падпіша акт аб уводзе завода ў эксплуатацыю.
— Спыняйце да серады гэты завод. Якая вы ўлада, калі пажарных на завод не пускаюць? Якая вы ўлада, калі камітэт аховы прыроды не можа заехаць на завод? Вы кажаце, што нічога не можаце. Вы ўсё можаце, калі хочаце і вам гэта трэба. Дык вось, калі ласка, зачыніце да серады гэты завод.
Сустрэча ў зале абласнога савета прафсаюзаў працягвалася каля 30 хвілін. Чакаецца, што ў сераду група актывістаў прыйдзе са сваімі пытаннямі на сустрэчу з губернатарам.
Каментары