Сенатар-рэспубліканец ад Каларада і член Хельсінкскай Камісіі ЗША Коры Гарднэр мае намер дамагацца прыняцця закона, па якому Дзярждэпартамент ЗША павінен будзе вызначыць, ці падпадае Расія пад вызначэнне «дзяржавы-спонсара тэрарызму». Пра гэта сенатар заявіў у інтэрв'ю Рускай службе «Голаса Амерыкі».
Сам Коры Гарднэр лічыць, што Расія адпавядае гэтаму вызначэнню.
«Паглядзіце на тое, што Расія зрабіла ў апошнія гады — яна аказала дапамогу рэжыму Асада ў Сірыі, які забівае нявінных людзей, і сама стала датычная да гэтых забойстваў, займалася атручваннямі ў Еўропе, фактычна ажыццявіўшы хімічную атаку. Гэта рэжым, які карыстаецца тэрорам для ажыццяўлення сваіх палітычных мэтаў», — сказаў сенатар.
«Я думаю, што вызначэнне Расіі як дзяржавы-спонсара тэрарызму накіруе сігнал па ўсім свеце, што гэта рэжым, які абапіраецца на беззаконне, што ён не спыняецца перад парушэннем асноўных нормаў міжнароднага права, і што Злучаныя Штаты гэтага не пацерпяць», — растлумачыў Коры Гарднэр.
Рашэнне Дзярждэпартамента ЗША аб прызнанні краіны спонсарам тэрарызму цягне за сабой шэраг жорсткіх палітычных і эканамічных санкцый, якія ўключаюць кантроль за экспартам тавараў двайнога прызначэння, забарону на эканамічную дапамогу, накладанне фінансавых і іншых абмежаванняў.
Зараз у спісе краін-спонсараў тэрарызму чатыры дзяржавы — Іран, Сірыя, Судан і Паўночная Карэя.
«Я спадзяюся, што мы правядзем слуханні па гэтым законе. Я чакаю, што ён сустрэне супраціў, але па-ранейшаму ўпэўнены, што гэта важная справа, якую мы павінны зрабіць», — сказаў на заканчэнне амерыканскі палітык.
Цяпер чытаюць
Анжаліка Мельнікава пасля знікнення набыла дзве кватэры ў Мінску90
Каментары