Гэта 145,5 тыс. чалавек.
У лютым работнікі 240 беларускіх прадпрыемстваў і арганізацый працавалі ў рэжыме няпоўнай занятасці або былі вымушаны ісці ў адпачынкі па ініцыятыве наймальнікаў.
Такія звесткі абнародаваў на брыфінгу 5 сакавіка ў Мінску намеснік міністра працы і сацыяльнай абароны Пётр Грушнік.
Паводле яго інфармацыі, у Брэсцкай вобласці налічвалася 44 такія прадпрыемствы, у Віцебскай — 25, у Гомельскай — 43, у Гродзенскай — 40, у Мінскай — 34, Магілёўскай — 54.
Агульная колькасць працаўнікоў на іх складала 145,5 тыс. чалавек.
Доля работнікаў, занятых у рэжыме няпоўнага працоўнага часу, ад колькасці ўсіх работнікаў на гэтых прадпрыемствах вагалася ад 14,4% у Мінскай вобласці да
44,4% — у Магілёўскай.Доля работнікаў, якія знаходзіліся ў вымушаных адпачынках па ініцыятыве наймальнікаў, вар’іравалася ад 1,9% у Гродзенскай вобласці да 17,9% — у Гомельскай.
Як заявіў П.Грушнік, прадастаўленне па ініцыятыве наймальнікаў адпачынкаў, скарачэнне працоўнага часу трэба разглядаць як антыкрызісныя меры, гнуткія формы занятасці насельніцтва і інструмент рэгулявання беспрацоўя. Паводле яго слоў, гэтыя меры «накіраваны на захаванне працоўных калектываў», гэта — праяўленне «сацыяльнай адказнасці да супрацоўнікаў».
Разам з тым, зазначыў намеснік міністра, павелічэнне аб’ёмаў неэфектыўнага выкарыстання працоўнага часу на вытворчасці — гэта патэнцыяльная база для росту беспрацоўя і ўзнікнення сацыяльнай напружанасці ў грамадстве.
Кантралюючы сітуацыю, Мінпрацы разам з іншымі зацікаўленымі міністэрствамі і ведамствамі праводзіць маніторынг сітуацыі на рынку працы. У выпадку яе далейшага пагаршэння міністэрства гатова да карэкціроўкі праграмы занятасці на 2009 год. У прыватнасці, магчыма больш актыўнае садзеянне занятасці насельніцтва і пераразмеркаванне з гэтай мэтай фінансавых рэсурсаў.
У якасці мер па ўзмацненні садзеяння занятасці Грушнік назваў: арганізацыю аплачваных грамадскіх работ; аказанне садзеяння ў развіцці прадпрымальніцкай дзейнасці беспрацоўных; прафесійную падрыхтоўку, перападрыхтоўку і павышэнне кваліфікацыі беспрацоўных; падтрымку за кошт бюджэтных пазык арганізацый, якія захоўваюць і ствараюць працоўныя месцы; развіццё сістэмы субсідавання працоўных месцаў; частковую кампенсацыю расходаў наймальнікаў па аплаце працы работнікаў.
Па ацэнцы Мінпрацы, пры павышэнні ўзроўню беспрацоўя да 2—3% запатрабуюцца дадатковыя бюджэтныя асігнаванні ў памеры 12 млрд. рублёў. Пакуль на рэалізацыю праграмы занятасці ў 2009 годзе намечана выдзеліць 151 млрд. рублёў.
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку16
Каментары