Не ўключылі «Сівую ноч». Мужчына пакрыўдзіўся на вядучых сельскай дыскатэкі — і прыйшоў у клуб са стрэльбай
У Давыд-Гарадку п'яны мужчына пакрыўдзіўся на вядучых сельскай дыскатэкі — і прыйшоў у клуб са стрэльбай, паведамляе МУС.
У мясцовым доме культуры п'яны наведвальнік папрасіў загадчыка клубам, які стаяў за пультам, уключыць вядомую кампазіцыю «Сівая ноч». Просьбу наведвальніка задаволілі, прычым не аднойчы. Аднак чарговае пажаданне аднавяскоўца станцаваць пад любімы хіт было праігнаравана, яму папросту параілі пакінуць дом культуры.
У выніку пакрыўджаны мужчына пайшоў. Праўда, неўзабаве вярнуўся з паляўнічай стрэльбай у руках і пачаў пагражаць загадчыку. Пазбегнуць магчымай трагедыі ўдалося дзякуючы сыну апошняга: хлопец схапіўся за дубальтоўку і адвёў яе ў бок. Пазней у падазраванага зброю адабралі і выклікалі міліцыянераў.
Зараз вясковец знаходзіцца ў ізалятары. Следчыя распачалі крымінальную справу па факце хуліганства з пагрозай прымянення зброі.
Каментары