Вага паўночнакарэйскага лідара перавысіла 140 кілаграмаў.
Лідар Паўночнай Карэі пакутуе ад «крайняй ступені атлусцення» і мае высокую рызыку сардэчна-сасудзістых захворванняў, паведамляе AFP са спасылкай на паўднёвакарэйскую разведку.
Пра апошнюю ацэнку стану здароўя Кім Чэн Ына расказаў дэпутат парламента Паўднёвай Карэі Юн Кон Ён.
«Яго стан здароўя класіфікуецца як крайняя ступень атлусцення, вага перавышае 140 кілаграмаў», — паведаміў ён са спасылкай на Нацыянальную разведвальную службу.
Паводле разведкі, у Кіма высокая рызыка развіцця сардэчна-сасудзістых захворванняў. Аднак ён не мае заўважных цяжкасцяў з фізічнай актыўнасцю і, у прыватнасці, можа ўзбягаць па лесвіцы.
«З улікам пастаяннага назірання з боку асабістай медыцынскай каманды лічыцца, што праблем са здароўем няма», — дадаў дэпутат.
Стан здароўя кіраўніка КНДР пільна адсочваюць за мяжой: яго раптоўная смерць можа выклікаць пытанні наконт перадачы ўлады і стабільнасці ў краіне з ядзернай зброяй.
Чуткі пра цяжкую хваробу Кім Чэн Ына ўжо ўзнікалі ў 2020 годзе, калі ён прапусціў урачыстасці з нагоды дня нараджэння свайго дзеда Кім Ір Сена і амаль на 20 дзён знік з публічнай прасторы.
Бацька і дзед паўночнакарэйскага лідара таксама мелі лішнюю вагу і шмат палілі. Абодва памерлі ад сардэчных прыступаў.
Былы супрацоўнік гатэля Metropole у Ханоі Пол Смарт, які падчас саміту КНДР і ЗША ў 2019 годзе працаваў з асабістымі кухарамі Кіма, расказваў, што паўночнакарэйскі лідар любіць ікру, амараў, фуа-гра.
Цяпер чытаюць
Той самы масажыст расказаў, навошта здымаў голых кліентак22
Каментары