Матч «МанСіці» — «Арсенал» перанесены. Справа ў хворым на каранавірус уладальніку трэцяга клуба, што наведаў распранальню лонданцаў
Кіраўніцтва Англійскай прэм'ер-лігі (АПЛ) прыняло рашэнне перанесці сустрэчу 28-га тура паміж «Манчэстэрам Сіці» і «Арсеналам», якая павінна была адбыцца 11 сакавіка ў Манчэстэры ў сувязі з успышкай каранавіруса. Пра гэта паведамляе прэс-служба АПЛ.
27 лютага «Арсенал» прымаў у Лондане грэчаскі «Алімпіякас» у рамках матчу 1/16 фіналу Лігі Еўропы (1:2). Уладальнік каманды гасцей Эвангелас Марынакіс (ён таксама ўладальнік «Нотынгема Форэст») у аўторак паведаміў, што заражаны каранавірусам. Усе гульцы і персанал грэчаскага клуба праходзяць праверку ў шпіталі. Кіраўніцтва АПЛ прыняла рашэнне не праводзіць матч «Манчэстэр Сіці» — «Арсенал» з меркаванняў бяспекі.
«Спадар Марынакіс сустракаўся з некаторымі гульцамі «Арсенала» і супрацоўнікамі клуба. Па гэтай прычыне АПЛ прыняла рашэнне перанесці матч, прызначаны на 11 сакавіка. Ліга разумее, што дадзеная сітуацыя прынясе нязручнасці і фінансавыя страты, аднак альтэрнатыўнага варыянту няма. Прымаюцца ўсе неабходныя меры, іншыя матчы туру не будуць перанесены», — цытуе паведамленне прэс-службы ТАСС.
Марынакіс таксама на сваёй старонцы ў інстаграме паведаміў, што падхапіў каранавірус.
«Новы вірус дабраўся і да мяне, і я адчуваю, што абавязаны паведамiць пра гэта грамадству. Пачуваюся добра, бо я прыняў усе неабходныя меры і прытрымліваюся інструкцый медыкаў.
Пераканаўча раю ўсім маім суграмадзянам рабіць тое ж самае. Жадаю ўсім хуткага выздараўлення».
Цяпер чытаюць
Азараў моцна пакрыўдзіўся на словы «псеўдалідаркі Ціханоўскай», што яго План Перамога быў памылкай31
Каментары