Першую вакцыну супраць каранавіруса пратэсціравалі ў ЗША ў панядзелак, 16 сакавіка, піша bbc.com.
Яе ўвялі 45 здаровым добраахвотнікам у навукова-даследчым цэнтры Kaiser Permanente ў Сіэтле.
Гэта першы тэст на чалавеку, падчас якога, каб паскорыць працэс, абмінулі звычайную ў такіх выпрабаваннях стадыю — праверку, што вакцына можа выклікаць імунную рэакцыю ў жывёл.
У той жа час біятэхналагічная кампанія Moderna Therapeutics, якая распрацавала вакцыну, сцвярджае, што працэс вытворчасці вакцыны быў выпрабаваны і правераны.
«Гэтая вакцына выкарыстоўвае даступныя тэхналогіі. Яна была выраблена па самых высокіх стандартах, выкарыстоўваючы бяспечныя для чалавека элементы. За тымі, хто ўдзельнічае ў выпрабаванні, будуць вельмі ўважліва назіраць», — кажа доктар Джон Трэгонінг, эксперт па інфекцыйных захворваннях з Імперскага каледжа ў Лондане.
Тыповыя супрацьвірусныя вакцыны — напрыклад, супраць адзёру — вырабляюцца з аслабленага альбо знішчанага віруса.
Але вакцына мРНК-1273 не была зробленая з віруса, які выклікае Covid-19.
Замест гэтага яна змяшчае кароткі сегмент генетычнага кода, скапіяванага з віруса, які навукоўцы змаглі ўзнавіць у лабараторыі.
Навукоўцы спадзяюцца, што гэта дапаможа імуннай сістэме арганізма змагацца з рэальнай інфекцыяй.
Валанцёры атрымаюць розныя дозы эксперыментальнай вакцыны праз дзве ін'екцыі з інтэрвалам 28 дзён у перадплечча.
Але нават калі гэтыя першапачатковыя выпрабаванні пройдуць добра, можа спатрэбіцца да 18 месяцаў, каб патэнцыяльная вакцына стала даступнай.
Каментары