Супрацоўнікі ДАІ ў Мінску затрымалі парушальніка правіл дарожнага руху на скрадзеным фургоне.
Сёння каля 4.00 у Мінску кіроўца аўтамабіля «Фольксваген LT» не выканаў патрабавання супрацоўніка ДАІ аб спыненні. Экіпаж пачаў пераслед. Сыходзячы ад пагоні, кіроўца груба парушаў правілы і неаднаразова ствараў пагрозу астатнім удзельнікам дарожнага руху. А на вуліцы Кіжаватава сутыкнуўся са службовым аўтамабілем.
Да пераследу падключыліся іншыя экіпажы ДАІ. Выехаўшы на Слуцкую шашу, парушальнік не зніжаў хуткасці і не даваў яго абагнаць. Аднак адзін з экіпажаў неўзабаве апярэдзіў фургон і кінуў на дарогу так званага «вожыка». Наехаўшы на яго, кіроўца «Фальксвагена LT» не справіўся з кіраваннем, з'ехаў у кювет і ўрэзаўся ў дрэва. Парушальніка затрымалі і даставілі ў бальніцу.
Як аказалася, за рулём знаходзіўся 24-гадовы неаднаразова судзімы жыхар Брэсцкай вобласці. Высветлілася, што аўтамабіль быў скрадзены з вуліцы Цімашэнкі, пра што ўладальнік пазней паведаміў у Фрунзенскае РУУС Мінска.
Каментары