Бяздомны пасярод ночы пракраўся ў кватэру, дзверы якой былі не зачынены, і скраў грошы і асабістыя рэчы гаспадароў, распавялі «Мінск-навінам» у пракуратуры Мінска.
— Жанчына, пачуўшы ў доме чыесьці крокі, разбудзіла мужа, — распавядае старшы памочнік пракурора горада Мінска па прававым забеспячэнні, інфармацыі і грамадскіх сувязях Наталля Косач. — Мужчына выйшаў у калідор і застаў там зламысніка.
Той не разгубіўся і паведаміў, што з'яўляецца супрацоўнікам органаў унутраных спраў, і, не звяртаючы ўвагі на здзіўленага гаспадара, спешна сышоў. Аднак далёка сысці не паспеў: яго затрымалі пацярпелыя, якія і выклікалі сапраўдных міліцыянтаў.
— У дачыненні да затрыманага была распачата крымінальная справа па ч. 2 арт. 205 КК Рэспублікі Беларусь (крадзеж). Дзяржаўны абвінаваўца прапаноўвала суду прызначыць пакаранне ў выглядзе абмежавання волі з накіраваннем у выпраўленчую ўстанову адкрытага тыпу на 2 гады.
Суд прызначыў яму арышт на 3 месяцы.
Каментары