Фенаменальна: тысячы людзей віталі Ціханоўскую ў вотчыне Качанавай, Наваполацку ФОТЫ, ВІДЭА
Кандыдат у прэзідэнты Святлана Ціханоўская працягвае ездзіць па краіне і выступаць на мітынгах. Сёння па дарозе з Глыбокага ў Віцебск яна разам са сваёй камандай прыехала ў Наваполацк. На мерапрыемства прыйшлі тысячы людзей. Такога ў Наваполацку ніколі раней не было.
За кіламетр ад месца мітынгу стаялі машыны, людзей так шмат, што прыпаркавацца немагчыма.
У 16:55 з'явілася сама Ціханоўская пад воплескі натоўпу. У натоўпе можна пабачыць нацыянальную сімволіку.
«Света, Света», — вітаюць кандыдатку людзі.
Ціханоўская пачала сваё выступленне з кароткага апісання свайго жыцця і дзейнасці мужа — Сяргея Ціханоўскага.
Ціханоўская кажа, што спачатку вельмі баялася, калі прыняла рашэнне зарэгістравацца, але потым зразумела, што не можа падвесці Сяргея і людзей, якія яго падтрымалі.
«Мы цяпер адна сіла», — сказала Ціханоўская аб аб'яднанні штабоў.
Так сустракалі Ціханоўскую.
Кандыдатка зноў паабяцала, што ідзе ў прэзідэнты тэрмінам не больш за паўгода. Яе галоўная мэта — правядзенне новых сумленных выбараў у краіне. Ціханоўская запэўнівае, што палітычных амбіцый ў яе няма.
«Не прыходзьце на датэрміновае галасаванне, прыходзьце 9 чысла», — кажа Ціханоўская.
Пасля выступу натоўп ізноў палка крычаў: «Света, Света!» і «Любім, можам, пераможам!».
Пасля Ціханоўскай слова на трыбуне ўзяла Марыя Калеснікава.
Сваю прамову Калеснікава пачала з акцэнтавання экалагічных праблем — тэма, актуальная для прамысловага Наваполацка.
Прадстаўнік штаба заявіла, што кожнае парушэнне на выбарах будзе зафіксавана.
«Беларусы выкарыстоўваюць толькі законныя метады, а ўлада адказвае на гэта гвалтам», — кажа Калеснікава.
Пасля слова ўзяла Вераніка Цапкала. Яна расказала гісторыю пра ад'езд яе мужа і дзяцей за мяжу.
Цапкала выказала салідарнасць з палітычнымі вязнямі, якія цяпер сядзяць у ізалятарах.
«Я хачу жыць і гадаваць сваіх дзяцей у Беларусі, а не ў іншай краіне», — эмацыйна сказала Цапкала.
Пасля выступу Веранікі Цапкала мітынг на вотчыне Наталлі Качанавай пачаў паступова завяршацца. Наступны пункт прызначэння — Віцебск.
Каментары