Мінчука асудзілі, бо «мацюкаўся на вуліцы». Жонка: Напаўаголенага мужа выцягвалі з кватэры людзі ў масках
51-гадовага Андрэя Гаралёва судзілі 19 лістапада па скайпе. Суддзя Цэнтральнага раёна Дзмітрый Карсюк прызнаў яго вінаватым у хуліганстве і непадпарадкаванні міліцыі і даў 15 сутак. Гаралёва абвінавачвалі ў тым, што ён нібыта размахваў рукамі і мацюкаўся на вуліцы, пасля супраціўляўся праваахоўнікам.
Вось толькі, па словах жонкі, Гаралёва амаль у адных трусах выцягвалі проста з яго кватэры невядомыя ў масках.
«У сераду, 18 лістапада, каля 8-й раніцы пагрукалі нам у дзверы. Муж падышоў, я засталася ў спальні, але ўсё чула, — узгадвае Зінаіда, жонка Андрэя Гаралёва. — Муж спытаў: хто там? Ніхто не адказаў. Муж перапытаў яшчэ раз.
У дзверы грукалі яшчэ і суседзям, яны нам потым сказалі. Суседзі дзверы не адчынілі.
А Андрэй адчыніў. І я чую, пайшла дзвіжуха, нейкі шум, пачалася як быццам барацьба. Я ўскочыла, выскачыла. Бачу 5 ці 6 чалавек, усе ў спартыўных касцюмах і белых медыцынскіх масках. Андрэя выцягнулі ў калідор, трое валяць на зямлю, спрабуюць надзець кайданкі. Я кажу: хто вы, што адбываецца? Яны мне: жанчына, адыдзіце!
Андрэю сказалі, што калі не будзе супраціўляцца, то здымуць кайданкі і кудысьці павязуць «на размову».
На шум выскачылі і двое нашых сыноў, 15 і 17 гадоў, бачылі ўсё гэта.
Калі Андрэя прыціскалі да падлогі, разбілі яму губу. Кроў цячэ, выгляд жудасны. Ён у майтках, тапачках і байцы на голае цела.
Я апранула Андрэя: штаны, красоўкі. Гэтыя чакалі, але казалі ў мой бок, што я цягну час.
Пыталася: куды яго забіраюць? Кажуць, Цэнтральнае РУУС. Паказалі нейкую корачку чырвонага колеру, у калідоры цёмна, я нічога не ўбачыла. Прасіла паказаць яшчэ раз, не далі.
На працягу дня я не магла знайсці мужа. У РУУС казалі, што ён на Акрэсціна, на Акрэсціна — што ён у РУУС. І так некалькі разоў. І потым я выпадкова ў размове з міліцыяй даведалася, што ён яшчэ ў аддзяленні. Гэта было 8 вечара ўжо».
19 лістапада Гаралёва судзілі.
«Судзілі Андрэя па скайпе. Абвінавацілі ў хуліганстве і супраціве міліцыі. Хуліганства заключалася ў тым, што ён нібыта чапляўся на вуліцы да людзей і лаяўся матам. Хаця затрымалі яго фактычна ў нашай кватэры, дзе мы за хвіліны да таго проста спакойна спалі, — кажа Зінаіда. — Далі Андрэю 15 сутак».
Гаралёў, па словах жонкі, дробны прадпрымальнік, цяпер у стадыі ліквідацыі ПУП. Чаму па яго прыйшлі, Зінаіда не ведае.
«Муж часта выказваў ЖЭСу прэтэнзіі, можа, з гэтым звязана? Не ведаю. Мы на шэсці не ходзім, у мітынгах не ўдзельнічаем. Нас там не маглі бачыць. Сцяг у акне не вісіць. Ні ён, ні я ніякіх палітычных блогаў ніколі не вялі», — кажа жанчына.
Каментары