Шрайбман пра амністыю: Важна, каб самыя вядомыя ворагі — палітвязні — публічна каяліся і звярталіся да яго за выратаваннем
«Вызваленне 13 палітвязняў, а да гэтага — каманды Прэс-клуба, Сяргея Павалішава з Hoster.by і Віктара Куўшынава з PandaDoc многія палічылі пачаткам гандлю з Захадам. У мяне іншае меркаванне», — піша Арцём Шрайбман у сваім тэлеграм-канале.
Маштаб саступкі не той. Для сігналу аб тым, што Лукашэнка гатовы гандлявацца, трэба было нешта куды больш сур'ёзнае, чым настолькі нязначная колькасць памілаваных на фоне новага набору палітвязняў і закіду новых груп мігрантаў пад польскую і літоўскую межы.
Я не гатовы ўявіць, што Мінск настолькі наіўны і не разумее, што такі сігнал асуджаны згубіцца на фоне ўсё яшчэ дамінуючай эскалацыі як унутры краіны, так і ў адносінах з суседзямі.
У гэтых памілаваннях я бачу, хутчэй, унутраную логіку. Лукашэнка часта паўтарае думку аб тым, што большасць тых, хто быў адурманены ў 2020-м, зразумелі, што ён меў рацыю, і адвярнуліся ад сваіх тэлеграм-лялькаводаў.
Як часта бывае з Лукашэнкам, паўтарэнне гэтага адарванага ад сацыяльнай рэальнасці тэзіса — спроба пераканаць у ім самога сябе. Яму важна адысці ад траўмы жніўня-2020, спакаваць гэта ў камфортную карціну свету, дзе аблудныя адумаліся і павярнуліся назад да яго, а ўсё гэта было проста часовым памутненнем.
Для гэтага важна, каб самыя радыкальныя, вядомыя або актыўныя ворагі — палітвязні — публічна каяліся і звярталіся да яго па выратаванне. Гэта жывое пацверджанне яго жаданай карціны светы.
Усё роўна, як выбіваюцца гэтыя раскаянні. Важна, каб іх было шмат, важна, каб яны менавіта прызналі віну і звярнуліся да яго з прашэннем усе, а не як у 2011 годзе, калі частка палітзэкаў адпускалі нават без іх просьбы, проста таму што гандляваліся з Еўропай.
Але мабыць, працэс збору прашэнняў ідзе так сабе. Даводзіцца матываваць астатніх. А для гэтага ім трэба не толькі пагаршаць умовы ў СІЗА і турмах, але і паказваць зваротныя прыклады, што вось людзі выканалі ўсе ўмовы — і наперад, на свабоду, а вы працягвайце гніць тут, пакуль не адумаецеся.
Ні Захад, ні Мінск яшчэ не саспелі для гандлю. Давер знішчаны, гуляць у трэці раз у адну і тую ж гульню ўсё яшчэ не хочацца, і замест гэтага бакі занятыя павышэннем адзін для аднаго цаны варожых дзеянняў. Мінск — праз мігрантаў, Захад — праз санкцыі.
І па цалкам надзейных даных, у пятым пакеце санкцый ЕС будуць далёка не толькі сімвалічныя абмежаванні. Са снежня Літва зусім сур'ёзна рыхтуецца да прыпынення транзіту калію з-за санкцый ЗША.
Гэта не той фон, на якім Лукашэнка захоча неадкладна прагнуцца і паскорыць свае памілаванні. Бо нават калі ён гэта зробіць, калію гэта не дапаможа. Планка для скасавання санкцый моцна падрасла за 10 гадоў.
Цяпер чытаюць
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў13
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай1313
Каментары